സുരേഷ് ഗോപി-ജോഷി ചിത്രം പാപ്പനിലെ ഗോകുൽ സുരേഷിന്റെ ക്യാരക്ടർ പോസ്റ്റർ പുറത്ത് വിട്ടു. വർഷങ്ങൾക്ക് ശേഷമാണ് ഒരു ജോഷി ചിത്രത്തിൽ സുരേഷ് ഗോപി നായകനായി എത്തുന്നത്. ജൂലൈ 29 നാണ് ചിത്രം തിയറ്ററിൽ എത്തുന്നത്. മാസ് ഫാമിലി ക്രൈം ഇൻവെസ്റ്റിഗേഷൻ ത്രില്ലറായി ഒരുക്കുന്ന ചിത്രത്തിൽ സുരേഷ് ഗോപിയ്ക്കൊപ്പം മകൻ ഗോകുൽ സുരേഷും അഭിനയിക്കുന്നത് ആരാധകർക്ക് ആവേശം നിറയ്ക്കുന്നുണ്ട്. ഇരുവരും തമ്മിലുള്ള ലൊക്കേഷൻ ചിത്രങ്ങൾ സമൂഹ മാദ്ധ്യമങ്ങളിൽ വൈറലായിരുന്നു. പിന്നീട് വന്ന ട്രെയിലറിലും അച്ഛനും മകനും തമ്മിലുള്ള രംഗങ്ങൾ കാണാം. ഇപ്പോൾ ചിത്രത്തിലെ ഗോകുലിന്റെ കഥാപാത്രത്തെ പരിചയപ്പെടുത്തിയിരിക്കുകയാണ് അണിയറ പ്രവർത്തകർ. മൈക്കിൾ എന്ന കഥാപാത്രത്തെയാണ് ഗോകുൽ സുരേഷ് അവതരിപ്പിക്കുന്നത്.
വമ്പൻ താരനിരയാണ് പാപ്പനിൽ അണിനിരക്കുന്നത്. നൈല ഉഷ, കനിഹ, നീത പിള്ള, ടിനി ടോം എന്നിങ്ങനെ വലിയ താരനിരയാണ് ചിത്രത്തിന്റെ ഭാഗമാകുന്നത്. ആരാധകരെ ആവേശം കൊള്ളിച്ചിരുന്ന ആക്ഷൻ സൂപ്പർസ്റ്റാറിന്റെ തീപ്പൊരി ഡയലോഗും ഹൈ വോൾട്ടേജ് സംഘട്ടന രംഗങ്ങളും ചിത്രത്തിൽ സിനിമാ പ്രേമികൾ പ്രതീക്ഷിക്കുന്നത്.
സിനിമയുടെ തിരക്കഥ രചിച്ചിരിക്കുന്നത് ആർജെ ഷാനാണ്. ഛായാഗ്രഹണം അജയ് ഡേവിഡ് കാച്ചപ്പിള്ളി. ശ്രീ ഗോകുലം മൂവീസിനു വേണ്ടി ഗോകുലം ഗോപാലൻ അവതരിപ്പിക്കുന്ന സിനിമ ഒരുങ്ങുന്നത് ഡേവിഡ് കാച്ചപ്പിള്ളി പ്രൊഡക്ഷൻസിന്റെയും ഇഫാർ മീഡിയയുടെയും ബാനറിലാണ്. ഗോകുലം ഗോപാലൻ, ഡേവിഡ് കാച്ചപ്പിള്ളി, റാഫി മതിര, എന്നിവർ ചേർന്നാണ് പാപ്പന്റെ നിർമ്മാണം. സംഗീതം-പശ്ചാത്തല സംഗീതം നിർവ്വഹിച്ചിരിക്കുന്നത് ജേക്സ് ബിജോയ് ആണ്.
Comments