ഹൈദരാബാദ്: മെട്രോ ട്രെയിനിനുള്ളിൽ യുവതി നൃത്തം ചെയ്യുന്നത് വൈറലായതിന് പിന്നാലെ വീഡിയോയിൽ പ്രത്യക്ഷപ്പെട്ട യുവതിക്കെതിരെ കേസെടുത്ത് അധികൃതർ. മെട്രോയിലെ വൈറൽ നൃത്തം ചെയ്ത ശ്രദ്ധയിൽപ്പെട്ടതിന് പിന്നാലെ ഹൈദരാബാദ് മെട്രോ റെയിൽ ലിമിറ്റഡ് (എച്ച്എംആർഎൽ) ആണ് നടപടി സ്വകീരിച്ചത്. യുവതി കർശന നിയമനടപടികൾ നേരിടേണ്ടി വരുമെന്ന് മെട്രോ അധികൃതർ വ്യക്തമാക്കി.
💃 Dance On Hyderabad Metro 🚄
When did this happen??? pic.twitter.com/ZilPdia9fx
— Hi Hyderabad (@HiHyderabad) July 20, 2022
‘ആണ്ടെ സുന്ദരാകിനി’ എന്ന തെലുങ്ക് ചിത്രത്തിലെ പാട്ടിനൊപ്പം ചുവടുവെയ്ക്കുന്ന യുവതിയുടെ വീഡിയോയ്ക്ക് വലിയ പ്രചാരമായിരുന്നു ലഭിച്ചത്. അതേസമയം വൈറലായ വീഡിയോയിലെ യുവതിയെ ഇതുവരെ തിരിച്ചറിഞ്ഞിട്ടില്ല. അതിനാൽ എത്രയും വേഗം യുവതിയെ കണ്ടെത്താനാണ് എച്ച്എംആർഎൽ എംഡിയായ എൻവിഎസ് റെഡ്ഡി ഉത്തരവിട്ടിരിക്കുന്നത്. മെട്രോയിലെ നിയമങ്ങൾ ലംഘിച്ചതിന് പെൺകുട്ടിക്കെതിരെ കേസെടുക്കുമെന്നാണ് അധികൃതർ വ്യക്തമാക്കുന്നത്. മെട്രോയുടെ പ്ലാറ്റ്ഫോമിലോ മെട്രോ ട്രെയിനിന് അകത്തോ ഫോട്ടോഗ്രഫി, വീഡിയോഗ്രഫി എന്നിവ കർശനമായി നിരോധിച്ചിരിക്കുന്ന സാഹചര്യത്തിലാണ് നീക്കം.
അതേസമയം യുവതിക്കെതിരെ നടപടിയെടുക്കുമെന്ന് മെട്രോ അധികൃതർ അറിയിച്ചതോടെ വ്യത്യസ്ത അഭിപ്രായങ്ങളാണ് സോഷ്യൽമീഡിയയിൽ ഉയർന്നത്. ചിലർ പെൺകുട്ടിയുടെ ധൈര്യത്തെ പ്രശംസിച്ചു. മറ്റ് ചിലർ മെട്രോയുടെ നടപടിയെ വിമർശിച്ചു. യുവതിയുടെ നൃത്തം വൈറലായത് ഹൈദരാബാദ് മെട്രോ സർവീസിനെ കൂടുതൽ പ്രമോട്ട് ചെയ്യാൻ സഹായിക്കുമെന്ന് ചിലർ രേഖപ്പെടുത്തി. അതിനാൽ യുവതിക്കെതിരെ നിയമനടപടി സ്വീകരിക്കരുതെന്ന നിലപാടാണ് പലരും അറിയിച്ചത്. അതേസമയം യുവതിയെ തിരഞ്ഞുകൊണ്ടിരിക്കുകയാണ് ഹൈദരാബാദ് മെട്രോയുടെ അധികൃതർ.
