ന്യൂഡൽഹി: മാദ്ധ്യമങ്ങൾക്കെതിരെ രൂക്ഷവിമർശവുമായി സുപ്രീം കോടതി ചീഫ് ജസ്റ്റിസ് എൻ.വി.രമണ. മാദ്ധ്യമ വിചാരണകളും അജണ്ടകൾ നിശ്ചയിച്ചുള്ള സംവാദങ്ങളും അനുകരണീയമല്ലാത്ത മാതൃകയാണ് സൃഷ്ടിക്കുന്നത്. അവ ജനാധിപത്യമൂല്യങ്ങളെ തകർക്കുകയാണ്. യാതൊരു നിഷ്പക്ഷതയും പൊതുസമൂഹത്തിന് മുന്നിൽ മാദ്ധ്യമങ്ങൾ പുലർത്തുന്നില്ലെന്നും രമണ തുറന്നടിച്ചു.
രാജ്യത്തെ നിർണ്ണായകമായ നിരവധി കേസുകളിൽ മാദ്ധ്യമങ്ങളുടെ നിരീക്ഷണവും വിശകലനവും നീതിപീഠത്തെ അവഗണിക്കുന്നതും അവഹേളിക്കുന്നതുമാണ്. അവർക്ക് ആരോടും ഒരു ഉത്തരവാദിത്തവുമില്ല. രാജ്യത്തെമ്പാടും ഈ പ്രവണ വർദ്ധിച്ചുവരുന്നു. എത്ര ബുദ്ധിമുട്ടിയാണ് ഒരു ന്യായാധിപൻ കേസ്സിന്റെ വിധി രൂപപ്പെടുത്തുന്നതെന്ന് എല്ലാവർക്കും ബോധ്യപ്പെടണമെന്നും രമണ പറഞ്ഞു.
ഇന്ന് മാദ്ധ്യമങ്ങൾ മറ്റൊരു കോടതിയുണ്ടാക്കുകയാണ്. പല നിർണ്ണായ സംഭവങ്ങളിലും ജഡ്ജിമാരെ കുഴക്കുന്നതും സമൂഹത്തിൽ നടക്കുന്ന വൈകാരിക ചർച്ചകളാണ്. ജനാധിപത്യ മൂല്യങ്ങൾക്കെതിരാണ് പല മാദ്ധ്യമചർച്ചകളെന്ന മുന്നറിയിപ്പും സുപ്രീം കോടതി മുഖ്യ ന്യായാധിപൻ നൽകി.
