തിരുവനന്തപുരം: എകെജി സെന്ററിലെ പടക്കമേറ് കേസിൽ ക്രൈം ബ്രാഞ്ച് പ്രത്യേക അന്വേഷണ സംഘം രൂപീകരിച്ചു. ക്രൈം ബ്രാഞ്ച് എസ് പി മധുസൂദനനാണ് അന്വേഷണ സംഘത്തിന്റെ തലവൻ. സംഭവം നടന്ന് ഒരു മാസം പിന്നിട്ടിട്ടും പ്രതികളെ പിടികൂടാത്തത് വിവാദമായിരുന്നു.
ക്രൈം ബ്രാഞ്ച് എസ് പി മധുസൂദനനെ കൂടാതെ ഡി വൈ എസ് പി ജലീൽ തോട്ടത്തിൽ, കന്റോണ്മെന്റ് എ.സി, വി എസ് ദിനരാജ് എന്നിവരും അന്വേഷണ സംഘത്തിലുണ്ട്. സ്ഫോടക വസ്തു നിയമ പ്രകാരം എടുത്ത കേസിലാണ് അന്വേഷണം.
എകെജി സെന്ററിലെ പടക്കമേറ് സിപിഎം ഗൂഢാലോചനയാണെന്ന് സിപിഐ ജില്ലാ സമ്മേളനത്തിൽ ഉൾപ്പെടെ വിമർശനം ഉയർന്നിരുന്നു. സംഭവം നടന്ന് ഒരുമാസം പിന്നിടുമ്പോഴും പ്രതികളെ കുറിച്ച് ഒരു തുമ്പ് പോലും പോലീസിന് ലഭിച്ചിട്ടില്ല എന്നത് വിമർശനങ്ങൾക്ക് ആക്കം കൂട്ടുകയാണ്.
അതേസമയം എകെജി സെന്ററിന് നേരെ നടന്ന പടക്കമേറിന് പിന്നിൽ സിപിഎം തന്നെയാണെന്നതിന്റെ തെളിവുകൾ ജനം ടി വി പുറത്ത് വിട്ടിരുന്നു. അന്വേഷണം വഴിമുട്ടിക്കാൻ ഉന്നതരുടെ ഇടപെടൽ നടന്നതായും ജനം ടി വി കണ്ടെത്തിയിരുന്നു. ഇത് സർക്കാരിനും സിപിഎമ്മിനും വലിയ തലവേദനയായിരുന്നു.
