തിയറ്ററുകളിൽ ആവേശം തീർക്കാൻ സുരേഷ്ഗോപി-ജോഷി കൂട്ടുക്കെട്ട്. ആരാധകർ ഏറെ കാത്തിരിക്കുന്ന പാപ്പൻ നാളെ തിയറ്റുകളിൽ റിലീസ് ചെയ്യും. ഒരുകാലത്ത് തിയറ്ററുകൾ ഇളക്കിമറിച്ച സുരേഷ്ഗോപി-ജോഷി കോംബോ തിരിച്ചെത്തുന്ന ആവേശത്തിലാണ് മലയാള സിനിമ പ്രേമികൾ. സിനിമയുടെ അനൗൺസ്മെന്റ് മുതൽ സുരേഷ്ഗോപി ആരാധകരും മലയാള സിനിമാ പ്രേക്ഷകരും ഒരേപോലെ കാത്തിരിക്കുന്ന സിനിമയാണ് പാപ്പൻ. റിലീസ് തിയതി പ്രഖ്യാപിച്ചത് മുതൽ താരങ്ങൾ വിവിധ ജില്ലകളിൽ പ്രമോഷനുമായി ബന്ധപ്പെട്ട് യാത്രയിലാണ്. വലിയ ഒരു മടങ്ങിവരവിനൊരുങ്ങുന്ന സുരേഷ്ഗോപിയ്ക്ക് വലിയ സ്വീകരണമാണ് ആരാധകരിൽ നിന്ന് ലഭിക്കുന്നത്. നാളെ റിലീസ് ചെയ്യുന്നതോടെ തിയറ്ററുകളിൽ പഴയ സുരേഷ്ഗോപി തരംഗം അലയടിക്കുമെന്ന് ഉറപ്പാണ്.
ചിത്രത്തിൽ എബ്രഹാം മാത്യു മാത്തൻ എന്ന കഥാപാത്രമായാണ് സുരേഷ് ഗോപി എത്തുന്നത്. ഒരു മർഡർ ഇൻവസ്റ്റിഗേഷൻ ത്രില്ലർ ചിത്രമായിരിക്കും പാപ്പൻ. മകൻ ഗോകുൽ സുരേഷും സുരേഷ് ഗോപിയ്ക്കൊപ്പം ആദ്യമായി അഭിനയിക്കുന്നു എന്നതും സിനിമയുടെ പ്രത്യേകതയാണ്. ‘പൊറിഞ്ചു മറിയം ജോസി’ന്റെ വലിയ വിജയത്തിനു ശേഷം ജോഷി സംവിധാനം ചെയ്യുന്ന ചിത്രം കൂടിയാണിത്. ചിത്രത്തിന്റെ തിരക്കഥയൊരുക്കുന്നത് ആർജെ ഷാനാണ്. സിനിമയിൽ സുരേഷ് ഗോപിക്ക് പുറമെ കനിഹ, നൈല ഉഷ, നീത പിള്ള, ആശ ശരത്ത്, കനിഹ, ചന്ദുനാഥ്, വിജയരാഘവൻ, ടിനി ടോം, ഷമ്മി തിലകൻ തുടങ്ങിയ വലിയ താരനിര അണിനിരക്കുന്നു.
ശ്രീ ഗോകുലം മൂവീസിന് വേണ്ടി ഗോകുലം ഗോപാലൻ അവതരിപ്പിക്കുന്ന ‘പാപ്പൻ’ ഒരുങ്ങുന്നത് ഡേവിഡ് കാച്ചപ്പിള്ളി പ്രൊഡക്ഷൻസിന്റെയും ഇഫാർ മീഡിയയുടെയും ബാനറിലാണ്. ഛായാഗ്രഹണം അജയ് ഡേവിഡ് കാച്ചപ്പിള്ളി, സംഗീതം ജേക്സ് ബിജോയ്, എഡിറ്റർ ശ്യാം ശശിധരൻ, സൗണ്ട് ഡിസൈൻ വിഷ്ണു ഗോവിന്ദ്, ശ്രീശങ്കർ, ആർട്ട് നിമേഷ് എം താനൂർ. മേക്കപ്പ് റോണെക്സ് സേവ്യർ, കോസ്റ്റ്യൂം പ്രവീൺ വർമ, പ്രൊഡക്ഷൻ കൺട്രോളർ എസ് മുരുകൻ ആഘോഷ് സിനിമാസും, ചാന്ദ് വി മൂവീസും ചേർന്നാണ് ചിത്രം തിയേറ്ററുകളിൽ എത്തിക്കുന്നത്. സുരേഷ് ഗോപിയുടെ അത്യുഗ്രൻ തിരിച്ച് വരവു തന്നെയാകും പാപ്പൻ എന്നാണ് പ്രേക്ഷകരുടെ പ്രതീക്ഷ.
