ബിർമിംഗ്ഹാം: കോമൺവെൽത്ത് ഗെയിംസിൽ ഇന്ത്യൻ താരങ്ങളുടെ മെഡൽ വേട്ട തുടരുന്നു. ജൂഡോയിൽ വെള്ളി മെഡൽ നേടിയ സുശീല ദേവിക്ക് പിന്നാലെ അതേ കായിക ഇനത്തിൽ, പുരുഷ വിഭാഗത്തിൽ ഇന്ത്യക്ക് രണ്ടാം മെഡൽ. വിജയ് കുമാർ യാദവാണ് പുരുഷന്മാരുടെ 60 കിലോ ഗ്രാം വിഭാഗത്തിൽ ഇന്ത്യക്ക് വേണ്ടി വെങ്കല മെഡൽ നേടിയത്.
സൈപ്രസിന്റെ പെട്രോസ് ക്രിസ്റ്റോഡൗലിഡ്സിനെ പരാജയപ്പെടുത്തിയാണ് ഇന്ത്യൻ താരത്തിന്റെ വെങ്കല മെഡൽ നേട്ടം. ഏറെക്കുറെ ഏകപക്ഷീയമായ മത്സരത്തിൽ, 48 സെക്കൻഡുകൾക്കുള്ളിൽ വിജയ് കുമാർ യാദവ് വിജയം പൂർത്തിയാക്കുകയായിരുന്നു.
നേരത്തേ, വനിതകളുടെ 48 കിലോ വിഭാഗം ജൂഡോയിൽ ഇന്ത്യയുടെ സുശീല ദേവിയ്‌ക്ക് വെള്ളി മെഡൽ ലഭിച്ചിരുന്നു. ഫൈനലിൽ ദക്ഷിണാഫ്രിക്കയുടെ മൈക്കല വിറ്റ്ബൂയിയോട് പൊരുതി തോറ്റതോടെയാണ് സുശീല ദേവിക്ക് വെള്ളി മെഡൽ ലഭിച്ചത്.
