ലഖ്നൗ: ഉത്തര്‍പ്രദേശിലെ ജെവാറിലുള്ള നോയിഡ അന്താരാഷ്‌ട്ര വിമാനത്താവളത്തിന്റെ പേര് നരേന്ദ്ര മോദി അന്താരാഷ്‌ട്ര വിമാനത്താവളം എന്നാക്കി മാറ്റുമെന്ന് മുഖ്യമന്ത്രി യോഗി ആദിത്യനാഥ് പ്രഖ്യാപിച്ചു. പൊതുപ്രവര്‍ത്തനരംഗത്ത് പ്രധാനമന്ത്രി നരേന്ദ്ര മോദി 25 വര്‍ഷം പൂര്‍ത്തിയാക്കിയ പശ്ചാത്തലത്തിലാണ് പ്രഖ്യാപനം. പൊതുസേവനത്തിലൂടെയുള്ള ജനക്ഷേമത്തിന്റെയും ജനപങ്കാളിത്തത്തിലൂടെ പൊതുജനവിശ്വാസം നേടിയതിന്റെയും സവിശേഷ ഉദാഹരണമാണ് മോദിയുടെ 25 വര്‍ഷത്തെ യാത്രയെന്ന് യോഗി ആദിത്യനാഥ് പറഞ്ഞു. പ്രധാനമന്ത്രിയുടെ കാഴ്ചപ്പാടില്‍നിന്ന് പ്രചോദനം ഉള്‍ക്കൊണ്ട് ഉത്തര്‍പ്രദേശ് പുതിയ ഭരണസംസ്‌കാരം സ്വീകരിച്ചിട്ടുണ്ടെന്നും അദ്ദേഹം കൂട്ടിച്ചേര്‍ത്തു.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
2026 മാര്‍ച്ച് 28-നാണ് പ്രധാനമന്ത്രി നരേന്ദ്ര മോദി വിമാനത്താവളത്തിന്റെ ആദ്യഘട്ടം ഉദ്ഘാടനം ചെയ്തത്. ജൂണ്‍ 15-ന് ലഖ്നൗവില്‍നിന്നുള്ള ഇന്‍ഡിഗോ വിമാനം എത്തിയതോടെ വിമാനത്താവളത്തില്‍ വാണിജ്യ വിമാന സര്‍വീസുകള്‍ ആരംഭിച്ചു. ഏകദേശം 11,200 കോടി രൂപ ചെലവിലാണ് വിമാനത്താവളത്തിന്റെ ആദ്യഘട്ടം വികസിപ്പിച്ചത്. പ്രതിവര്‍ഷം 1.2 കോടി യാത്രക്കാരെ കൈകാര്യം ചെയ്യാനുള്ള ശേഷിയാണ് ആദ്യഘട്ടത്തിലുള്ളത്. ഭാവിയില്‍ വികസനത്തിലൂടെ യാത്രക്കാരെ കൈകാര്യം ചെയ്യാനുള്ള ശേഷി പ്രതിവര്‍ഷം ഏഴ് കോടിയായി ഉയര്‍ത്താനാണ് ലക്ഷ്യമിടുന്നത്. ഡല്‍ഹി മേഖലയിലെ വിമാനഗതാഗത തിരക്ക് കുറയ്‌ക്കുന്നതിനും ഉത്തര്‍പ്രദേശിന്റെ പടിഞ്ഞാറന്‍ മേഖലകളിലേക്കുള്ള വ്യോമയാന ബന്ധം മെച്ചപ്പെടുത്തുന്നതിനും വിമാനത്താവളം സഹായിക്കുമെന്നാണ് പ്രതീക്ഷ.
