ന്യൂഡൽഹി: ഇൻഡിഗോ വിമാനത്തിന് നേരെ പാഞ്ഞടുത്ത് ഗോ-ഫസ്റ്റ് എയർലൈനിന്റെ കാർ. ഡൽഹി വിമാനത്താവളത്തിനുള്ളിലായിരുന്നു അസാധാരണമായ സംഭവം നടന്നത്.
ഗോ ഫസ്റ്റിന്റെ കാർ പെട്ടെന്ന് അനിയന്ത്രിതമായി വിമാനത്തിന് നേരെ പാഞ്ഞടുക്കുകയായിരുന്നു. പെട്ടെന്ന് വിമാനത്തിന് മുൻവശത്തെ ചക്രങ്ങൾക്ക് സമീപം വിമാനത്തിന് തൊട്ടുകീഴിലായി കാർ വന്നു നിന്നു. നേരിയ വ്യത്യാസത്തിനായിരുന്നു ഇൻഡിഗോ വിമാനത്തിന്റെ മുൻ ചക്രങ്ങൾ കാറിനെ തട്ടാതിരുന്നത്. വിമാനത്താവളത്തിനുള്ളിൽ വൻ ദുരന്തമാണ് ഒഴിവായതെന്ന് അധികൃതർ വ്യക്തമാക്കി.
#WATCH | A Go Ground Maruti vehicle stopped under the nose area of the Indigo aircraft VT-ITJ that was parked at Terminal T-2 IGI airport, Delhi. It was an Indigo flight 6E-2022 (Delhi–Patna) pic.twitter.com/dxhFWwb5MK
— ANI (@ANI) August 2, 2022
ഇന്ന് രാവിലെ പാറ്റ്നയിലേക്ക് പുറപ്പെടാൻ തയ്യാറെടുക്കുന്നതിനിടെയായിരുന്നു ഇൻഡിഗോ വിമാനത്തിന് നേരെ ഗോ ഫസ്റ്റ് എയർലൈനിന്റെ സ്വിഫ്റ്റ് ഡിസയർ കാർ പാഞ്ഞുവന്നത്. ഇൻഡിഗോയുടെ എ 320 നിയോ വിമാനത്തിനടിയിൽ കാർ അകപ്പെടുന്ന ദൃശ്യങ്ങളും ഇതിനിടെ പുറത്തുവന്നു. ഡൽഹി എയർപോർട്ടിലെ ടി2 ടെർമിനലിലായിരുന്നു സംഭവമുണ്ടായത്. ഇക്കാര്യത്തിൽ ഡിജിസിഎ വിശദമായ റിപ്പോർട്ട് തേടിയിട്ടുണ്ട്.
അതേസമയം കാർ ഡ്രൈവർ മദ്യപിച്ചിരുന്നതായി ആരോപണങ്ങൾ ഉയർന്നെങ്കിലും പരിശോധനയിൽ ഇല്ലെന്ന് തെളിഞ്ഞു. സംഭവത്തിൽ വിമാനത്തിന് കേടുപാടുകളോ പോറലോ സംഭവിച്ചിട്ടില്ലെന്നും ആർക്കും പരിക്കേറ്റിട്ടില്ലെന്നും അധികൃതർ വ്യക്തമാക്കി. ഷെഡ്യൂൾ ചെയ്ത സമയത്ത് തന്നെ ഇൻഡിഗോ വിമാനം പുറപ്പെടുകയും ചെയ്തിരുന്നു. എന്നാൽ സംഭവത്തിൽ പ്രതികരിക്കാൻ ഇൻഡിഗോയും ഗോ ഫസ്റ്റും ഇതുവരെ തയ്യാറായിട്ടില്ല.
