ചെക്ക് വാഹന നിർമ്മാതാക്കളായ സ്കോഡ ഓട്ടോ ഇന്ത്യ 2022 ജൂലൈ മാസത്തെ തങ്ങളുടെ വിൽപ്പന കണക്കുകൾ പുറത്തുവിട്ടു. ഈ വർഷം ജൂലൈയിൽ 4,447 യൂണിറ്റുകൾ വിറ്റഴിച്ചുവെന്ന് കമ്പനി വ്യക്തമാക്കി. കഴിഞ്ഞ വർഷം ഇതേ കാലയളവിൽ വിറ്റഴിക്കപ്പെട്ടത് 3,080 യൂണിറ്റുകളാണ്. ഇത് താരതമ്യപ്പെടുത്തുമ്പോൾ കഴിഞ്ഞ വർഷത്തെ അപേക്ഷിച്ച് 44 ശതമാനം വളർച്ച രേഖപ്പെടുത്തിട്ടുണ്ടെന്നാണ് സ്കോഡ ഓട്ടോ ഇന്ത്യ വെളിപ്പെടുത്തുന്നത്. സ്ലാവിയ സെഡാൻ, കുഷാക്ക് എസ്‌യുവി തുടങ്ങിയ പുതിയ വാഹനങ്ങളാണ് കമ്പനിയുടെ വളർച്ചയ്‌ക്ക് സഹായകമായിരിക്കുന്നത്.
ഇന്ത്യ 2.0 പ്രോജക്ടിന് കീഴിലുള്ള സ്കോഡയുടെ പുതിയ വാഹനങ്ങൾ സ്കോഡയുടെയും മാതൃ കമ്പനിയായ ഫോക്‌സ്‌വാഗന്റെയും വിൽപ്പനയിൽ വർദ്ധനവ് വരുത്തി. 2021 ജൂലൈയിലാണ് ആദ്യത്തെ ഇന്ത്യ 2.0 വാഹനം കമ്പനി പുറത്തിറങ്ങിയത്. ഒരു വർഷം പൂർത്തിയാക്കുന്ന വേളയിലാണ് വളർച്ചയുണ്ടായതായി കമ്പനി അറിയിച്ചിരിക്കുന്നത്. കുഷാക്ക് എസ്‌യുവിയുടെ വില്‍പ്പനയാണ് സ്കോഡയുടെ വിൽപ്പന കണക്കുകൾ ഉയർത്തിയത്. അടുത്തിടെ പുറത്തിറക്കിയ സ്ലാവിയയും മികച്ച വില്‍പ്പനയാണ് രേഖപ്പെടുത്തിയത്.
കുഷാക്ക്, സ്ലാവിയ എന്നിവയ്‌ക്ക് പുറമെ കമ്പനിയുടെ ഒക്ടാവിയ, സൂപ്പർബ് എന്നിവയും മികച്ച പ്രകടനം കാഴ്ചവെക്കുന്നുണ്ടെന്ന് സ്കോഡ പറയുന്നു. കഴിഞ്ഞ വർഷത്തെ ജൂലൈ മാസത്തെ അപേക്ഷിച്ച് ഈ മാസം വളർച്ച രേഖപ്പെടുത്തുന്നുണ്ടെങ്കിലും കഴിഞ്ഞ ജൂൺ മാസത്തെ വെച്ച് താരതമ്യപ്പെടുത്തുമ്പോൾ വലിയ കുറവുണ്ടെന്ന് സ്കോഡ വ്യക്തമാക്കുന്നു. 2022 ജൂണിൽ 6,023 കാറുകൾ വിറ്റഴിക്കപ്പെട്ടിരുന്നു. ഇതുമായി ബന്ധപ്പെടുത്തി നോക്കിയാൽ ഈ മാസം വിൽപ്പനയിൽ 26 ശതമാനം കുറവുണ്ടായിട്ടുണ്ട്.
