പതിമൂന്നാമത് ഭരത് മുരളി പുരസ്കാരം മലയാളി താരം ദുർഗ കൃഷ്ണയ്ക്ക്. ഉടൽ സിനിമയിലെ മികച്ച പ്രകടനത്തിനാണ് പുരസ്കാരം ലഭിക്കുന്നത്. 25000 രൂപയും പ്രശസ്തി പത്രവും അടങ്ങുന്നതാണ് പുരസ്കാരം. ഈ മാസം 30ന് കൊല്ലം പ്രസ് ക്ലബ്ബ് ഹാളിൽ നടക്കുന്ന ചടങ്ങിൽ സംവിധായകൻ കെ പി കുമാരൻ പുരസ്കാരം താരത്തിന് സമ്മാനിക്കും.
സംവിധായകൻ ആർ ശരത്, മാധ്യമ പ്രവർത്തകൻ എം കെ സുരേഷ്, കൾച്ചറൽ സെന്റർ ചെയർമാൻ പല്ലിശ്ശേരി, സെക്രട്ടറി വി കെ സന്തോഷ് കുമാർ എന്നിവരടങ്ങിയ ജൂറിയാണ് പുരസ്കാരം നിശ്ചയിച്ചത്.
അന്തരിച്ച നടൻ മുരളിയുടെ പേരിൽ ഭരത് മുരളി കൾച്ചറൽ സെന്റർ ആണ് പുരസ്കാരം ഏർപ്പെടുത്തിയിരിക്കുന്നത്. രതീഷ് രഘുനന്ദൻ തിരക്കഥയെഴുതി സംവിധാനം ചെയ്ത ചിത്രമാണ് ഉടൽ. ദുർഗ കൃഷ്ണയ്ക്ക് പുറമെ ഇന്ദ്രൻസ്, ധ്യാൻ ശ്രീനിവാസൻ എന്നിവരും ചിതത്തിൽ പ്രധാന കഥാപാത്രങ്ങളെ അവതരിപ്പിക്കുന്നു.ശ്രീ ഗോകുലം മൂവിസിന്റെ ബാനറിൽ ഗോകുലം ഗോപാലൻ ആണ് ചിത്രം നിർമ്മിച്ചിരിക്കുന്നത്. നായിക ആയി എത്തിയ ദുർഗക്കെതിരെ ചിത്രത്തിന്റെ റിലീസിന് പിന്നാലെ സൈബർ അക്രമണങ്ങൾ നിരവധി ഉണ്ടായിരുന്നു. എന്നാൽ അതേ ചിത്രത്തിലെ അഭിനയത്തിനാണ് താരം അവാർഡിന് അർഹയായത്.
Comments