റോയൽ എൻഫീൽഡ് ആരാധകർ ഏറെ കാത്തിരുന്ന വാഹനമാണ് ഹണ്ടർ 350. നാളുകളുടെ കാത്തിരിപ്പിനൊടുവിൽ ഐക്കണിക്ക് ഇരുചക്ര വാഹന നിർമ്മാതാക്കൾ അവരുടെ പുതിയ ബുള്ളറ്റ് ഇന്ത്യയിൽ അവതരിപ്പിച്ചു. റോയൽ എൻഫീൽഡ് ഹണ്ടർ 350 യുടെഎക്സ്-ഷോറൂം വില 1.49 ലക്ഷം രൂപയിൽ ആരംഭിച്ച് 1.68 ലക്ഷം രൂപ വരെ ഉയരുന്നുണ്ട്. വാഹനത്തിന്റെ ടെസ്റ്റ് റൈഡുകളും ഡെലിവറികളും ഓഗസ്റ്റ് 10-ന് ആരംഭിക്കും. റെട്രോ, മെട്രോ എന്നിങ്ങനെ രണ്ട് വേരിയെന്റുകളിലാണ് ബുള്ളറ്റ് ലഭ്യമാകുന്നത്.
റെട്രോ ഹണ്ടർ ഫാക്ടറി സീരീസ്(1.49 ലക്ഷം രൂപ), മെട്രോ ഹണ്ടർ ഡാപ്പർ സീരീസ്(1.63 ലക്ഷം രൂപ), മെട്രോ ഹണ്ടർ റിബൽ സീരീസ്(1.68 ലക്ഷം രൂപ) എന്നിങ്ങനെയാണ് മൂന്ന് ട്രിം ലെവലുകളിലാണ് ഹണ്ടർ 350 പുറത്തിറങ്ങിയിരിക്കുന്നത്. എട്ട് കളർ സ്കീമുകളിലാണ് കമ്പനി ബുള്ളറ്റിനെ ആരാധകർക്കിടയിലേയ്ക്ക് അവതരിപ്പിക്കുന്നത്. ഹണ്ടർ മെട്രോയ്ക്കുള്ള റിബൽ ബ്ലാക്ക്, റെബൽ റെഡ്, റിബൽ ബ്ലൂ, ഡാപ്പർ ആഷ്, ഡാപ്പർ വൈറ്റ്, ഡാപ്പർ ഗ്രേ, ഹണ്ടർ 350-ന്റെ റെട്രോ വേരിയന്റ് ഫാക്ടറി സിൽവർ, ഫാക്ടറി ബ്ലാക്ക് എന്നീ നിറങ്ങളിൽ ബുള്ളറ്റ് ലഭ്യമാകും.
6,100 ആർപിഎമ്മിൽ 20.2 ബിഎച്ച്പിയും 4,000 ആർപിഎമ്മിൽ 27 എൻഎം പീക്ക് ടോർക്കും നൽകുന്ന 349 സിസി, സിംഗിൾ സിലിണ്ടർ, എയർ-ഓയിൽ കൂൾഡ്, ഫ്യൂവൽ ഇഞ്ചക്റ്റഡ് മോട്ടോറാണ് പുതിയ 2022 റോയൽ എൻഫീൽഡ് ഹണ്ടർ 350-ന് കരുത്ത് പകരുന്നത്. 5 സ്പീഡ് മാനുവൽ ഗിയർബോക്സുമായി ഘടിപ്പിച്ചിരിക്കുന്ന എഞ്ചിൻ ലിറ്ററിന് 36.2 കിലോമീറ്റർ മൈലേജ് നൽകുമെന്നും കമ്പനി അവകാശപ്പെടുന്നു. മാത്രമല്ല, ഹണ്ടർ 350 ക്ക് മുന്നിൽ ടെലിസ്കോപിക് ഫോർക്കുകളും പിന്നിൽ 6-സ്റ്റെപ്പ് ക്രമീകരിക്കാവുന്ന ഇരട്ട ഷോക്ക് അബ്സോർബറുകളും ലഭിക്കുന്നു.
17 ഇഞ്ച് ടയറുകളാണ് ഹണ്ടർ 350-യ്ക്ക് നൽകിയിരിക്കുന്നത്. വേരിയന്റിനെ ആശ്രയിച്ച് സ്പോക്ക് വീലുകളും അലോയ്കളും തിരഞ്ഞെടുക്കാം. ഡ്യുവൽ-ചാനൽ എബിഎസിനൊപ്പം ഡിസ്ക് ബ്രേക്കുകൾ രണ്ടറ്റത്തും ലഭിക്കുന്നു. ഫീച്ചറുകളുടെ കാര്യത്തിൽ, ഹണ്ടർ 350-ന് RE-യുടെ ട്രിപ്പർ നാവിഗേഷൻ പോഡ് ഒരു ഓപ്ഷണൽ ആക്സസറിയായി ലഭിക്കുന്നു. ട്യൂബ്-ടൈപ്പ് ടയറുകൾ, സിംഗിൾ-ചാനൽ എബിഎസ്, റിയർ ഡ്രം ബ്രേക്ക്, ഹാലൊജൻ ടേൺ ഇൻഡിക്കേറ്ററുകളോട് കൂടിയ സ്പോക്ക് വീലുകൾ എന്നിവ അടിസ്ഥാന വേരിയന്റിൽ ലഭിക്കും. ഉയർന്ന വേരിയന്റുകൾക്ക് എൽഇഡി ടേൺ ഇൻഡിക്കേറ്ററുകൾ, അലോയ് വീലുകൾ, ഡ്യുവൽ-ചാനൽ എബിഎസ് എന്നിവ ലഭിക്കും.
