സ്വാതന്ത്ര്യത്തിന്റെ 75-ാം വാർഷികം ഒത്തൊരുമയോടെ ആഘോഷമാക്കാൻ അഭ്യർത്ഥിച്ച് നടൻ രജനീകാന്ത്. നമ്മൾ ഇന്ന് സ്വാതന്ത്ര്യത്തോടെ കഴിയുന്നതിന് വർഷങ്ങളോളം ലക്ഷക്കണക്കിന് ദേശാഭിമാനികൾ ജീവൻ നൽകി. ഭാരതത്തിന് വേണ്ടി ജീവൻ നൽകിയ പോരാളികൾക്കും സ്വാതന്ത്ര്യ സമരസേനാനികൾക്കും ആദരം ആർപ്പിക്കുന്നതിന് ഓഗസ്റ്റ് 15-ാം തീയതി ജനങ്ങൾ എല്ലാവരും തയ്യാറാവണമെന്ന് അദ്ദേഹം അഭ്യർത്ഥിച്ചു.
ജാതി, മത, രാഷ്‌ട്രീയ ഭേദമന്യേ എല്ലാവരും ഭാരതീയൻ എന്ന നിലയിൽ അഭിമാനത്തോടെ ഓത്തൊരുമ്മയോടെ ദേശീയ പാതകകൾ ഉയർത്തണം. അടുത്ത തലമുറയുടെ കൈകളിൽ ദേശീയ പതാകകൾ നൽകി ദേശീയത വളർത്തണമെന്നും രജനീകാന്ത് പറഞ്ഞു. നാടില്ല എങ്കിൽ നമ്മൾ ഇല്ല എന്നും ഭാരതീയർ എന്നതിൽ നമ്മൾ അഭിമാനിക്കണമെന്നും വീഡിയോയിലൂടെ നടൻ സന്ദേശം നൽകി.
അതേയമയം, പ്രധാനമന്ത്രി ആഹ്വാനം ചെയ്ത ഹർ ഘർ തിരംഗയെ ഇരു കൈയ്യും നീട്ടി സ്വീകരിച്ചിരിക്കുകയാണ് രാജ്യം. കേരളത്തിൽ മമ്മൂട്ടി, മോഹൻലാൽ, സുരേഷ് ഗോപി തുടങ്ങി പ്രമുഖ താരങ്ങളും വീടുകളിൽ ദേശീയ പതാക ഉയർത്തി ആദരം അർപ്പിച്ചു. ഓഗസ്റ്റ് 13 മുതൽ 15 വരെ വീടുകളിലും സർക്കാർ-സ്വകാര്യ സ്ഥാപനങ്ങളിലുമെല്ലാം ദേശീയ പതാക ഉയർത്തണമെന്നാണ് കേന്ദ്രസർക്കാർ നിർദ്ദേശം. രാജ്യത്ത് 20 കോടിയിലധികം വീടുകളിൽ പതാക ഉയർത്താനാണ് സർക്കാർ തീരുമാനം.
