ന്യൂഡൽഹി: അടുത്ത 25 വർഷം കൊണ്ട് ഇന്ത്യ വികസിത രാഷ്ട്രമായി മാറണമെന്ന് പ്രഖ്യാപിച്ച് പ്രധാനമന്ത്രി നരേന്ദ്രമോദി. 2047 ആകുമ്പോഴേക്കും ഭാരതം അഞ്ച് സുപ്രധാന ലക്ഷ്യങ്ങൾ കൈവരിച്ച് സ്വാതന്ത്ര്യസമര സേനാനികളുടെ സ്വപ്നം സഫലമാക്കണമെന്ന് പ്രധാനമന്ത്രി ആഹ്വാനം ചെയ്തു. ഇതിനായി അഞ്ചുകാര്യങ്ങൾ നാം മനസിലുറപ്പിക്കേണ്ടതുണ്ടെന്നും അദ്ദേഹം വ്യക്തമാക്കി.
1. അടുത്ത 25 വർഷത്തിനുള്ളിൽ ഇന്ത്യ ഒരു വികസിത രാഷ്ട്രമായി മാറണം. രാജ്യത്തിന്റെ പുരോഗതിക്കായി നമ്മുടെ യുവാക്കാൾ അവരുടെ ജീവിതകാലം സമർപ്പിക്കണമെന്ന് പ്രധാനമന്ത്രി അഭ്യർത്ഥിച്ചു. മുഴുവൻ മനുഷ്യരാശിയുടെയും വികസനത്തിനായി പ്രവർത്തിക്കണമെന്നും അദ്ദേഹം പറഞ്ഞു.
2. മറ്റുള്ളവരെപ്പോലെയാകാൻ ഭാരതം ശ്രമിക്കരുതെന്ന് മോദി ഓർപ്പിച്ചു. നാം ഓരോരുത്തരുടെയും മനസിൽ അടിമത്തത്തിന്റെ ഒരു അംശം പോലും ഉണ്ടാകരുതെന്ന് പ്രധാനമന്ത്രി ആവശ്യപ്പെട്ടു. ചിലപ്പോൾ ഭാഷ മൂലമുള്ള തടസങ്ങളാൽ നമ്മുടെ കഴിവുകൾ പരിമിതപ്പെട്ടേക്കാം. എന്നാൽ ഭാരത്തിലുള്ള ഓരോ ഭാഷകളെക്കുറിച്ചും നമ്മുടെയുള്ളിൽ അഭിമാന ബോധമാണ് ഉണ്ടാകേണ്ടതെന്ന് പ്രധാനമന്ത്രി പറഞ്ഞു.
3. നമ്മുടെ പൈതൃകത്തെക്കുറിച്ച് അഭിമാനിക്കണമെന്നും പ്രധാനമന്ത്രി കൂട്ടിച്ചേർത്തു. നാം നമ്മുടെ അടിവേരുകളുമായി ബന്ധം പുലർത്തിയാൽ മാത്രമേ ഉയരങ്ങൾ കീഴടക്കാനും ഉയരങ്ങളിൽ പാറി പറക്കാനും നമ്മുക്ക് കഴിയൂ. ഉയരങ്ങളിലെത്തുമ്പോൾ ലോകത്തിന്റെ ആശങ്കകൾക്ക് പരിഹാരം കണ്ടെത്താൻ ഭാരതത്തിന് കഴിയുമെന്നും പ്രധാനമന്ത്രി പറഞ്ഞു.
4. ഭാരതമെന്ന ജനാധിപത്യ രാഷ്ട്രത്തിന്റെ ഉന്നമനത്തിനായി പ്രവർത്തിക്കാൻ ഒറ്റ ജനതയായി നാം നിലകൊള്ളണം. സമരസതയാണ് ഇന്ത്യയുടെ പുരോഗതിയുടെ ആണിക്കല്ല്. ‘രാഷ്ട്രം ആദ്യമെന്ന’ മന്ത്രത്തിലാണ് ഭാരതീയർ ഒന്നിച്ചുനിൽക്കേണ്ടതെന്നും പ്രധാനമന്ത്രി വ്യക്തമാക്കി.
5. നമ്മുടെ മാതൃരാജ്യത്തോട് നിറവേറ്റാനുള്ള കടമകൾ ഓരോ ഭാരതീയനും നിറവേറ്റണമെന്നും പ്രധാനമന്ത്രി ചെങ്കോട്ടയിൽ നടന്ന സ്വാതന്ത്ര്യദിന പ്രസംഗത്തിൽ ആഹ്വാനം ചെയ്തു.
