രാജ്യം 76-ാം സ്വാതന്ത്ര്യ ദിനം ആഘോഷിക്കുമ്പോൾ ഭിന്നശേഷിക്കാരായ കുട്ടികൾക്കൊപ്പമുള്ള വീഡിയോ പങ്കുവച്ച് അമിതാ ബച്ചൻ. ആംഗ്യ ഭാഷയിലൂള്ള ദൃശ്യ ആവിഷ്ക്കാരവുമായാണ് ബച്ചനും കുട്ടികളും എത്തിയിരിക്കുന്നത്. പ്രത്യേക കഴിവുള്ള കുട്ടികളുമായി ചേർന്ന് ജനഗണമന എന്ന ദേശീയ ഗാനത്തിന്റെ ആംഗ്യ ഭാഷ കൊണ്ടുള്ള ദൃശ്യ ആവിഷ്ക്കാരമാണ് ഇത്.
ഒരു കൂട്ടർ ദേശീയ ഗാനം ആലപിക്കുമ്പോൾ ബച്ചനും മറ്റു കുട്ടികളും ചേർത്ത് ആംഗ്യ ഭാഷയിൽ അത് അവതരിപ്പിക്കുന്നു. ചെങ്കോട്ടയുടെ പശ്ചാത്തലത്തിൽ നിന്നു കൊണ്ടാണ് ഇവർ ഗാനം ആലപിക്കുന്നത്.നിരവധി പേരാണ് ഇതിന് ആശംസകൾ അറിയിച്ചിരിക്കുന്നത്.അമിതാഭ് ബച്ചന്റെ ചെറുമകൾ നവ്യ നവേലി നന്ദ, ഷാം കൗശൽ, എല്ലി അവ്റാം, മനീഷ് പോൾ, എന്നിവരും ആശംസ അറിയിച്ചിട്ടുണ്ട്.
രാജ്യം സ്വാതന്ത്ര്യ ദിനം വിപുലമായി ആഘോഷിക്കുകയാണ്. ഈ വേളയിൽ കല ,കായികം, രാഷ്ട്രീയം തുടങ്ങി നിരവധി മേഖലയിലെ ആളുകൾ ആശംസകൾ നേർന്ന് രംഗത്തെത്തി. ആഘോഷങ്ങളുടെ ഭാഗമായി രാജ്യം ഇതുവരെ കാണാത്ത പലമാറ്റങ്ങളും ജനങ്ങൾ കണ്ടു. ആസാദ് കാ അമൃത് മഹോത്സവത്തിന്റെ ഭാഗമായി സംഘടിപ്പിച്ച ഹർ ഘർ തിരംഗ ക്യാമ്പയിന്റെ അടിസ്ഥാനത്തിൽ എല്ലാ വീടുകളിലും ജനങ്ങൾ പതാക ഉയർത്തി. ജാതി മത ഭേദമെന്യേ രാജ്യത്തെ ജനങ്ങൾ അതിൽ പങ്കാളികളായി. രാജ്യം ഇത് വരെ കണ്ടിട്ടില്ലാത്ത ആഘോഷ പരിപാടികളിലൂടെയാണ് ഇന്ന് നാം കടന്ന് പോകുന്നത്.
