പാലക്കാട്: സിപിഎം മലമ്പുഴ ലോക്കൽ കമ്മറ്റിയംഗം ഷാജഹാന്റെ കൊലപാതകം അന്വേഷിക്കാനായി പ്രത്യേക അന്വേഷണ സംഘത്തെ രൂപീകരിച്ചു. പാലക്കാട് ഡിവൈഎസ്പി യുടെ നേതൃത്വത്തിലാണ് അന്വേഷണ സംഘം.
കേസിന്റെ ഗൗരവവും വ്യാപ്തിയും കണക്കിലെടുത്താണ് പ്രത്യേക അന്വേഷണ സംഘത്തെ രൂപീകരിക്കുന്നതെന്നാണ് ഇത് സംബന്ധിച്ച ഉത്തരവിൽ പറയുന്നത്. ഡിവൈഎസ്പിയടക്കം 20 പേരാണ് പ്രത്യേക അന്വേഷണ സംഘത്തിൽ ഉളളത്. സൈബർ വിഭാഗത്തിൽ നിന്ന് ഉൾപ്പെടെയുളളവർ സംഘത്തിലുണ്ട്.
കുറ്റകൃത്യം രജിസ്റ്റർ ചെയ്തിട്ടുളള മലമ്പുഴ പോലീസ് സ്്്റ്റേഷനിൽ നിന്നും ഇതുമായി ബന്ധപ്പെട്ട ഫയലുകൾ അടിയന്തിരമായി പാലക്കാട് ഡിഎസ്പിക്ക് കൈമാറണമെന്നും ഉത്തരവിൽ നിർദ്ദേശിക്കുന്നുണ്ട്.
ഇന്നലെയാണ് സ്വാതന്ത്ര്യദിനത്തിന് മുന്നോടിയായുളള അലങ്കാരങ്ങൾ നടത്തുന്നതിനിടെ ഷാജഹാനെ ഒരു സംഘം വെട്ടിക്കൊലപ്പെടുത്തിയത്. അക്രമികൾ സിപിഎമ്മുമായി ബന്ധമുളളവർ തന്നെയാണെന്ന് ദൃക്സാക്ഷികൾ വെളിപ്പെടുത്തിയിട്ടുണ്ട്. ദേശാഭിമാനി പത്രം വരുത്തുന്നതുമായി ബന്ധപ്പെട്ട തർക്കവും കൊലപാതകത്തിന് കാരണമായതായും സാക്ഷികൾ പറയുന്നു.
എന്നാൽ ആർഎസ്എസും ബിജെപിയുമാണ് സംഭവത്തിന് പിന്നിലെന്ന സിപിഎം ആരോപണം വിവാദമായിരുന്നു. ഇതിനെതിരെ ബിജെപി രംഗത്തെത്തുകയും പ്രതികൾ സിപിഎം പ്രവർത്തകരാണെന്ന് വ്യക്തമാക്കുന്ന സമൂഹമാദ്ധ്യമചിത്രങ്ങളും പ്രൊഫൈലുകളും അടക്കം പരസ്യപ്പെടുത്തുകയും ചെയ്തു. ഇതിനിടയിലാണ് പ്രത്യേക അന്വേഷണ സംഘത്തെ രൂപീകരിച്ചിരിക്കുന്നത്.
Comments