തിയറ്ററുകളിൽ കൈയ്യടി നേടി മുന്നേറുകയാണ് കുഞ്ചാക്കോ ബോബൻ നായകനായി എത്തിയ ‘ന്നാ താൻ കേസ് കൊട്’. നടന്റെ കരിയറിലെ തന്നെ ഏറ്റവും വ്യത്യസ്തമാർന്ന വേഷമാണ് ചിത്രത്തിലേത്. ഏറെ പ്രേഷക പ്രശംസ പിടിച്ചുപ്പറ്റിയ ചിത്രം തിയറ്ററുകളിൽ ഒരാഴ്ച പിന്നിട്ടിരിക്കുകയാണ്. ഇപ്പോൾ ചിത്രത്തിന്റെ ബോക്സ്ഓഫീസ് കണക്ക് ഔദ്യോഗികമായി പുറത്തുവിട്ടിരിക്കുകയാണ് അണിയറ പ്രവർത്തകർ. ഓഗസ്റ്റ് 11 ന് റിലീസ് ചെയ്ത ചിത്രം ഇതിനോടകം 25 കോടി നേടിയെന്ന് നിർമ്മാതാക്കൾ വെളിപ്പെടുത്തി. ചാക്കോച്ചന്റെ ഏറ്റവും വലിയ ഹിറ്റിലേയ്ക്കാണ് സിനിമ കടന്നരിക്കുന്നത്.
ആൻഡ്രോയിഡ് കുഞ്ഞപ്പൻ എന്ന സിനിമയിലൂടെ ശ്രദ്ധേയനായ രതീഷ് ബാലകൃഷ്ണ പൊതുവാളാണ് ചിത്രത്തിന്റെ സംവിധായകൻ. വളരെ സാമൂഹിക പ്രസക്തിയുള്ള ഒരു വിഷയം ആക്ഷേപ ഹാസ്യത്തിന്റെ മേമ്പൊടിയോടെ പറയുന്ന സിനിമയാണ് ‘ന്നാ താൻ കേസ് കൊട്’. ചാക്കോച്ചന്റെ വ്യത്യസ്തമാർന്ന നൃത്തത്തിലൂടെ തന്നെ ശ്രദ്ധ പിടിച്ചുപറ്റിയ ചിത്രം ഇടത് സൈബർ ഇടങ്ങളിൽ വിവാദം തീർക്കുകയും ചെയ്തിരുന്നു. ചിത്രത്തിന്റെ പരസ്യത്തിൽ കേരളത്തിലെ റോഡുകളിലെ കുഴികളെക്കുറിച്ച് പരാമർശം നടത്തിയതിന് പിന്നാലെ വലിയ തരത്തിൽ ഇടത് പ്രൊഫൈലുകളിൽ നിന്ന് ചിത്രത്തിനെതിരെ ഡീ ഗ്രേഡിംഗ് നടന്നിരുന്നു. എന്നാൽ ജനങ്ങൾ സിനിമ ഏറ്റെടുത്തതോടെ തിയറ്ററുകൾ ജനസാഗരമാകുകയായിരുന്നു.
എസ്.ടി. കെ ഫ്രെയിംസിന്റെ ബാനറിൽ സന്തോഷ് ടി. കുരുവിളയാണ് ‘ന്നാ താൻ കേസ് കൊട്’ നിർമ്മിച്ചിരിക്കുന്നത്. മഹേഷിന്റെ പ്രതികാരം, മായാനദി, ആൻഡ്രോയ്ഡ് കുഞ്ഞപ്പൻ, വൈറസ്, ആർക്കറിയാം, നാരദൻ എന്നീ മികച്ച സിനിമകൾ മലയാളികൾക്ക് സമ്മാനിച്ച സന്തോഷ് ടി. കുരുവിളയുടെ പന്ത്രാണ്ടാമത്തെ ചിത്രമാണിത്. രാകേഷ് ഹരിദാസാണ് (ഷെർണി ഫെയിം) ഛായാഗ്രാഹകൻ. മനോജ് കണ്ണോത്ത് എഡിറ്റർ. സംഗീതം ഡോൺ വിൻസന്റ്. ഗായത്രി ശങ്കറാണ് സിനിമയിൽ കുഞ്ചാക്കോ ബോബന്റെ നായിക. ബേസിൽ ജോസഫ്, ഉണ്ണി മായ, പി.പി. കുഞ്ഞികൃഷ്ണൻ, രാജേഷ് മാധവൻ എന്നിവരാണ് സിനിമയിലെ മറ്റ് പ്രധാന താരങ്ങൾ.
