തന്റെ ജീവിതത്തിലുണ്ടായ മോശം കാലഘട്ടത്തിലെ അനുഭവങ്ങൾ പങ്കുവെച്ച് നടൻ ഷൈൻ ടോം ചാക്കോ. ജയിലിൽ കിടന്ന സമയത്ത് ഒരാൾ പോലും ഇനി സിനിമയിലേക്ക് വിളിക്കുമെന്ന് താൻ കരുതിയിരുന്നില്ലെന്ന് താരം പറഞ്ഞു. തന്നെ സംബന്ധിച്ച് ഒരാൾ ഒരു അവസരം നൽകുന്നത് ഒരു വലിയ കാര്യമാണന്നും ഷൈൻ വ്യക്തമാക്കി. കുടുക്ക് സിനിമയുമായി ബന്ധപ്പെട്ട് നടന്ന വാർത്താ സമ്മേളനത്തിൽ സംസാരിക്കുകയായിരുന്നു ഷൈൻ.
കാശിന്റെ പേരിൽ ഒരിക്കൽ പോലും സിനിമയിൽ അഭിനയിക്കാതിരിക്കില്ല. കൊറോണ കാലത്ത് എത്ര പേരാണ് ശമ്പളം കിട്ടാതെ ജോലി ചെയ്തത്. പൈസ വേണ്ട ജോലി മതിയെന്ന് പറഞ്ഞവരുമുണ്ട്. തനിക്ക് അറിയാവുന്ന ഒരേയൊരു ജോലി അഭിനയമാണെന്നും പ്രധാനമന്ത്രിയാക്കാം എന്ന് പറഞ്ഞാലും താൻ വരില്ലെന്നും ഷൈൻ പറഞ്ഞു.
മമ്മൂട്ടിയുടെ സിനിമയോടുള്ള അർപ്പണബോധത്തെക്കുറിച്ചും ഷൈൻ സംസാരിച്ചു. ഇപ്പോഴുള്ള നടന്മാരെല്ലാം ഒന്നോ രണ്ടോ സിനിമ കഴിഞ്ഞാൽ ലോകം ചുറ്റാൻ പോകും. എന്നാൽ മമ്മൂക്ക സെറ്റിൽ നിന്ന് സെറ്റിലേക്ക് യാത്ര ചെയ്യുകയാണ്. സിനിമയോടുള്ള അടങ്ങാത്ത സ്നേഹം കൊണ്ടാണത്. ”ഉണ്ട” എന്ന സിനിമ മമ്മൂക്കയോടൊപ്പം ചെയ്യുമ്പോഴുണ്ടായ അനുഭവവും ഷൈൻ പറഞ്ഞു. ഭക്ഷണം കഴിച്ചുകൊണ്ടിരിക്കുന്നതിനിടെയാണ് അദ്ദേഹത്തെ ഷോട്ടിന് വിളിച്ചത്. അപ്പോൾ തന്നെ അദ്ദേഹം ഭക്ഷണം മതിയാക്കി പോകുകയാണ് ചെയ്തത് എന്നും ഷൈൻ ടോം പറഞ്ഞു.
