ആരാധകർ കാത്തിരിക്കുന്ന ചിയാൻ വിക്രം ചിത്രം കോബ്രയുടെ സെൻസറിംഗ് പൂർത്തിയായി . ചിത്രത്തിന് യു/ എ സർട്ടിഫിക്കറ്റ് ലഭിച്ചു . പ്രേക്ഷകർ ഏറെ പ്രതീക്ഷയോടെ കാത്തിരിക്കുന്ന ചിത്രം സംവിധാനം ചെയ്തിരിക്കുന്നത് ആർ അജയ് ജ്ഞാനമുത്തുവാണ്. ആക്ഷൻ ത്രില്ലർ വിഭാഗത്തിൽ പെടുന്ന ചിത്രമാണെങ്കിലും പാട്ടുകൾക്ക് ഏറെ പ്രധാന്യം നൽകിയിട്ടുണ്ട്.ചിത്രത്തിലെ ഗാനങ്ങൾക്ക് സംഗീതം പകർന്നിരിക്കുന്നത് എ ആർ റഹ്മാനാണ്.
മഹാന് ശേഷമെത്തുന്ന വിക്രം ചിത്രമാണിത്.വിക്രം ഏഴ് വ്യത്യസ്ത ഗെറ്റപ്പുകളിൽ പ്രത്യക്ഷപ്പെടുന്ന ചിത്രം ചിത്രീകരണസമയത്ത് തന്നെ വാർത്തകളിൽ ഇടംപിടിച്ചിരുന്നു. ക്രിക്കറ്റ് താരം ഇർഫാൻ പത്താന്റെ സിനിമാ അരങ്ങേറ്റമായ ചിത്രത്തിൽ മലയാളത്തിൽ നിന്ന് റോഷൻ മാത്യുവും മിയ ജോർജും സർജാനോ ഖാലിദും പ്രധാന കഥാപാത്രങ്ങളെ അവതരിപ്പിക്കുന്നുണ്ട്.
കെജിഎഫിലൂടെ സുപരിചിതയായ ശ്രീനിധി ഷെട്ടി നായികയാവുന്ന ചിത്രത്തിൽ കെ എസ് രവികുമാർ, ആനന്ദ്രാജ്, റോബോ ശങ്കർ, മിയ ജോർജ്, മൃണാളിനീ രവി, മീനാക്ഷി ഗോവിന്ദ്രാജൻ തുടങ്ങിയവരും അഭിനയിക്കുന്നു.
7 സ്ക്രീൻ സ്റ്റുഡിയോസിന്റെ ബാനറിൽ എസ് എസ് ലളിത് കുമാർ നിർമ്മിക്കുന്ന ചിത്രത്തിന്റെ ഛായാഗ്രഹണം ഹരീഷ് കണ്ണൻ ആണ്. എഡിറ്റിംഗ് ഭുവൻ ശ്രീനിവാസൻ. ആക്ഷൻ കൊറിയോഗ്രഫി ദിലീപ് സുബ്ബരായൻ. ചീഫ് കോ ഡയറക്ടർ മുഗേഷ് ശർമ്മ.
ഓഗസ്റ്റ് 31 നാണ് ചിത്രം തിയറ്ററുകളിൽ എത്തുക.
