ഹരാരേ: ശുഭ്മാൻ ഗില്ലിന്റെ മികച്ച സെഞ്ച്വറിയുടേയും ഇഷാൻ കിഷന്റെ അർദ്ധ സെഞ്ച്വറിയുടേയും കരുത്തിൽ ഇന്ത്യയ്ക്ക് മികച്ച സ്കോർ. 8 വിക്കറ്റിന് ഇന്ത്യ 289 റൺസാണ് എടുത്തത്. ശുഭ്മാൻ ഗിൽ 97 പന്തിൽ 130 റൺസ് എടുത്തപ്പോൾ ഇഷാൻ കിഷൻ 61 പന്തിലാണ് അർദ്ധസെഞ്ച്വറി പൂർത്തിയാക്കി മടങ്ങിയത്. വാലറ്റത്തെ പിടിച്ചുകെട്ടാൻ സിംബാബാവേ യ്ക്കായതാണ് ഇന്ത്യൻ സ്കോർ 300 കടക്കുന്നതിന് തടസ്സമായത്.
ടോസ് നേടി ബാറ്റിംഗിനിറങ്ങിയ ഇന്ത്യയ്ക്കായി ശിഖർ ധവാൻ(40) കെ.എൽ.രാഹുൽ(30) എന്നിവരാണ് ഭേദപ്പെട്ട തുടക്കമിട്ടത്. ഇരുവരും പുറത്തായ ശേഷം ഒരുമിച്ച ഗില്ലും ഇഷാനും 140 റൺസിന്റെ നിർണ്ണായക കൂട്ടുകെട്ടാണ് ഉണ്ടാക്കിയത്. ഒരു സിക്സറും 15 ഫോറുകളു മടക്കമാണ് ശുഭ്മാൻ ഗിൽ തന്റെ സെഞ്ച്വറി നേട്ടം കൊയ്തത്. 61 പന്തിൽ 6 ഫോറുകളടക്കമാണ് ഇഷാൻ കിഷൻ 50 റൺസ് തികച്ചത്. ഇഷാൻ കിഷൻ പുറത്തായ ശേഷമെത്തിയ ദീപക് ഹൂഡ(1), അക്ഷർ പട്ടേൽ(1) ഷാർദ്ദൂൽ ഠാക്കൂർ(9) എന്നിവർ രണ്ടക്കം തികയ്ക്കാനാകാതെ മടങ്ങിയപ്പോൾ പതിവ് ഫോമിലേയ്ക്കെത്തിയില്ലെങ്കിലും ഗില്ലിനൊപ്പം സഞ്ജു സാംസൺ(15) 30 റൺസ് കൂട്ടിച്ചേർത്തു.
സിംബാബാവേയ്ക്കായി ബ്രാഡ് ഇവാൻസ് 5 വിക്കറ്റുകൾ വീഴ്ത്തി ഏറ്റവും മികച്ച പ്രകടനം പുറത്തെടുത്തു. വിക്ടർ നാവോച്ചി, ലൂക് ജോംഗ്വേ എന്നിവർ ഓരോ വിക്കറ്റ് വീഴ്ത്തി.
