മൂന്ന് വര്‍ഷം, മൂന്ന് ഐസിസി കിരീടങ്ങള്‍; അജിത് അഗാര്‍ക്കറിന്റെ കാലാവധി അവസാനിച്ചു; നന്ദിയുമായി ബിസിസിഐയും ഗംഭീറും

ന്യൂഡല്‍ഹി: ഇന്ത്യന്‍ ക്രിക്കറ്റ് ടീമിന്റെ മികച്ച മുന്നേറ്റത്തിന് പിന്നിലെ സംഭാവനകള്‍ക്ക് മുന്‍ ചീഫ് സെലക്ടര്‍ അജിത് അഗാര്‍ക്കറിന് നന്ദിയറിയിച്ച് ബിസിസിഐ. പുരുഷ ടീമിന്റെ സീനിയര്‍ സെലക്ഷന്‍ കമ്മിറ്റി ചെയര്‍മാനായിരുന്ന അഗാര്‍ക്കറുടെ മൂന്ന് വര്‍ഷത്തെ കാലാവധി ഒക്ടോബര്‍ നാലിന് അവസാനിച്ചിരുന്നു. കാലാവധി ഒരു വര്‍ഷത്തേക്ക് കൂടി നീട്ടാന്‍ അര്‍ഹതയുണ്ടായിരുന്നെങ്കിലും അഗാര്‍ക്കര്‍ അതിന് അപേക്ഷിച്ചില്ല. 2023 ജൂലൈയിലാണ് അഗാര്‍ക്കര്‍ ചീഫ് സെലക്ടറായി ചുമതലയേറ്റത്. അദ്ദേഹത്തിന്റെ കാലയളവില്‍ ഇന്ത്യ മൂന്ന് ഐസിസി കിരീടങ്ങളാണ് സ്വന്തമാക്കിയത്. 2024ലും 2026ലും ടി20 ലോകകപ്പ് കിരീടങ്ങള്‍ നേടിയ ഇന്ത്യ, 2025ല്‍ ചാമ്പ്യന്‍സ് ട്രോഫിയും സ്വന്തമാക്കി.

ഏകദിന ലോകകപ്പിലും ഇന്ത്യ മികച്ച പ്രകടനം നടത്തി. 2023ലെ ഏകദിന ലോകകപ്പില്‍ ഇന്ത്യ ഫൈനലിലെത്തിയെങ്കിലും കിരീടം നേടാനായില്ല. ഏഷ്യന്‍ ഗെയിംസിലും ഇന്ത്യന്‍ ക്രിക്കറ്റ് ടീമുകള്‍ തുടര്‍ച്ചയായി സ്വര്‍ണം നേടിയതായി ബിസിസിഐ ചൂണ്ടിക്കാട്ടി. അഗാര്‍ക്കറുടെ കാലാവധിയെ പ്രശംസിച്ചുകൊണ്ട് ബിസിസിഐ സമൂഹമാധ്യമമായ എക്‌സില്‍ കുറിച്ചത് ഇന്ത്യന്‍ ക്രിക്കറ്റിലെ അവിസ്മരണീയ നിമിഷങ്ങള്‍ നിറഞ്ഞ കാലയളവായിരുന്നു എന്നാണ്. മൂന്ന് ഐസിസി കിരീടങ്ങള്‍, രണ്ട് ഏഷ്യാ കപ്പ് കിരീടങ്ങള്‍, തുടര്‍ച്ചയായ രണ്ട് ഏഷ്യന്‍ ഗെയിംസ് സ്വര്‍ണ മെഡലുകള്‍, 2023 ഏകദിന ലോകകപ്പ് ഫൈനലിലേക്കുള്ള മുന്നേറ്റം എന്നിവയും ബിസിസിഐ എടുത്തുപറഞ്ഞു.

സെലക്ഷന്‍ കമ്മിറ്റി ചെയര്‍മാനെന്ന നിലയിലെ അഗാര്‍ക്കറുടെ പ്രതിബദ്ധതയ്‌ക്കും സംഭാവനകള്‍ക്കും നന്ദി അറിയിച്ച ബിസിസിഐ, ഭാവി യാത്രയ്‌ക്ക് ആശംസകളും നേര്‍ന്നു. അഗാര്‍ക്കറിന്റെ പ്രവര്‍ത്തനങ്ങളെ ഇന്ത്യന്‍ ക്രിക്കറ്റ് ടീം പരിശീലകന്‍ ഗൗതം ഗംഭീറും പ്രശംസിച്ചു. ടീമിനാണ് എല്ലായ്‌പ്പോഴും പ്രഥമ പരിഗണന നല്‍കിയതെന്നും ഉറച്ച നിലപാടോടെയും പ്രതിബദ്ധതയോടെയുമാണ് അദ്ദേഹം പ്രവര്‍ത്തിച്ചതെന്നും ഗംഭീര്‍ പറഞ്ഞു. അഗാര്‍ക്കറുടെ കാലയളവില്‍ ഇന്ത്യ നേടിയ മൂന്ന് ഐസിസി കിരീടങ്ങള്‍ ചൂണ്ടിക്കാട്ടിയ ഗംഭീര്‍, ഇന്ത്യന്‍ ക്രിക്കറ്റിന് നല്‍കിയ സംഭാവനകള്‍ക്ക് നന്ദി അറിയിച്ചു.

Don’t miss the latest breaking news and updates! Subscribe to Janam TV’s WhatsApp channel now…

https://whatsapp.com/channel/0029Va4LMqWE50UdrVhraq0y

അഗാര്‍ക്കറിന്റെ പ്രവര്‍ത്തനങ്ങള്‍ ചരിത്രം മികച്ച രീതിയില്‍ ഓര്‍ക്കുമെന്നും ഭാവിയിലേക്കുള്ള അദ്ദേഹത്തിന്റെ യാത്രയ്‌ക്ക് ആശംസകള്‍ നേരുന്നതായും ഗംഭീര്‍ പറഞ്ഞു. അഗാര്‍ക്കറുടെ കാലാവധി അവസാനിച്ചതിന് പിന്നാലെ സെലക്ഷന്‍ കമ്മിറ്റിയിലെ ഒഴിവുള്ള ഒരു സ്ഥാനത്തേക്ക് ബിസിസിഐ അപേക്ഷ ക്ഷണിച്ചിട്ടുണ്ട്.