ന്യൂഡൽഹി : വിവാദ കൊമേഡിയൻ മുനവർ ഫാറൂഖിയുടെ ഷോ റദ്ദാക്കി ഡൽഹി പോലീസ്. ഞായറാഴ്ച നടത്താനിരുന്ന പരിപാടിയാണ് പോലീസ് റദ്ദാക്കിയത്. ഇയാളുടെ ഷോ പ്രദേശത്തെ സാമുദായിക സൗഹാർദ്ദത്തെ ബാധിക്കും എന്ന് വ്യക്തിമാക്കിക്കൊണ്ട് സെൻട്രൽ ഡിസ്ട്രിക്റ്റ് പോലീസ് യൂണിറ്റ് റിപ്പോർട്ട് സമർപ്പിച്ചതിനെ തുടർന്നാണ് നടപടി.
ഹിന്ദു ദൈവങ്ങളെ ഉൾപ്പെടെ അവഹേളിച്ച മുനവർ ഫാറൂഖിയുടെ ഷോ റദ്ദാക്കണമെന്ന് ആവശ്യപ്പെട്ട് വിശ്വ ഹിന്ദു പരിഷത്ത് ഉൾപ്പെടെ രംഗത്തെത്തിയിരുന്നു. ഷോ റദ്ദാക്കിയില്ലെങ്കിൽ വിഎച്ച്പിയുടെയും ബജ്റംഗ്ദളിന്റെയും പ്രവർത്തകർ പ്രതിഷേധം സംഘടിപ്പിക്കുമെന്നും ഡൽഹി പോലീസ് കമ്മീഷണർക്ക് അയച്ച കത്തിൽ വ്യക്തമാക്കിയിരുന്നു.
കഴിഞ്ഞയാഴ്ച ബംഗളൂരുവിൽ നടത്താനിരുന്ന ഇയാളുടെ പരിപാടിയും പോലീസ് റദ്ദാക്കിയിരുന്നു. പരിപാടി സംഘടിപ്പിക്കാൻ നേരത്തെ അനുമതി തേടാത്തതിനെ തുടർന്നായിരുന്നു നടപടി. ജയ് ശ്രീറാം സേന എന്ന സംഘടന ബംഗളൂരു പോലീസ് കമ്മീഷണർക്ക് പരാതി നൽകുകയുമുണ്ടായി. ഫാറൂഖി തന്റെ പരിപാടികളിൽ ശ്രീരാമനെയും സീതാദേവിയെയും അപമാനിക്കുന്ന പരാമർശങ്ങൾ നടത്തി ഹിന്ദുവികാരം വ്രണപ്പെടുത്തിയെന്നുമാണ് സംഘടന പരാതിയിൽ ആരോപിച്ചത്.
