ദുബൈ : വിവിധ രാജ്യങ്ങളിലേക്ക് പ്രവർത്തനം വ്യാപിപ്പിക്കുന്നതിന്റെ ഭാഗമായി ആശിർവാദ് സിനിമാസ് ദുബൈയിൽ പുതിയ ഓഫീസ് ആരംഭിച്ചു. യുഎഇയിലെ സിനിമാ വിതരണ കമ്പനിയായ ഫാർസ് സിനിമാസുമായി കൈകോർത്താണ് ആശിർവാദ് പ്രവർത്തിക്കുക. പ്രവർത്തനം അന്താരാഷ്ട്ര തലത്തിലേക്ക് വ്യാപിപ്പിക്കുമ്പോൾ ദുബൈ ആയിരിക്കും പ്രധാന കേന്ദ്രം. ദുബൈ ഓഫീസ് ഉദ്ഘാടനം ചെയ്തതിന്റെ വീഡിയോ സമൂഹമാദ്ധ്യമത്തിലൂടെ പങ്കുവെച്ച് മോഹലാൽ തന്നെയാണ് ഇക്കാര്യം അറിയിച്ചത്.
മലയാളികളുടെ ഏക്കാലത്തെയും പ്രിയപ്പെട്ട ചിത്രങ്ങളിൽ ഒന്നായ നരസിംഹം മുതൽ നിരവധി ഹിറ്റുകൾ സമ്മാനിച്ച ആശിർവാദ് സിനിമാസാണ് ദുബൈയിൽ പുതിയ തുടക്കം കുറിച്ചിരിക്കുന്നത്. അന്താരാഷ്ട്ര തലത്തിൽ സിനിമകൾ നിർമ്മിക്കാനും വിതരണം ചെയ്യാനുമാണ് ഇതിലൂടെ ആശിർവാദ് ലക്ഷ്യമിടുന്നത്.
ദുബൈയിൽ എത്തിയപ്പോൾ ഒരു പാൻ ഇന്ത്യൻ ചിത്രത്തിൽ അഭിനയിക്കുന്നതിനും മോഹൻലാൽ ഒപ്പുവെച്ചിരുന്നു. ‘വൃഷഭ’ എന്ന ചിത്രത്തിലാണ് മോഹൻലാൽ നായകനാകുന്നത്. നന്ദ കിഷോറാണ് സംവിധാനം. ഇക്കാര്യം മോഹൻലാൽ തന്നെയാണ് അറിയിച്ചത്.മോഹൻലാലിന്റതായി ഇനി പ്രദർശനത്തിന് എത്താനുള്ള ചിത്രം ‘മോൺസ്റ്റർ’ ആണ്. പുലിമുരുകനു ശേഷം മോഹൻലാലിനെ നായനാക്കി വൈശാഖ് സംവിധാനം ചെയ്യുന്നുവെന്നതു തന്നെയാണ് ചിത്രത്തിന്റെ വലിയ ആകർഷണം. മോഹൻലാൽ ആരാധകർ ആകാംക്ഷയോടെ കാത്തിരിക്കുന്ന ചിത്രമാണ് ഇത്.
