കോട്ടയം : ആർപ്പൂക്കരയിൽ പത്തടി നീളമുള്ള രാജവെമ്പാലയെ പിടികൂടി. ഒരു മാസം മുൻപ് കാറിൽ കയറിയ രാജവെമ്പാലയെയാണ് വനംവകുപ്പ് ഉദ്യോഗസ്ഥരെത്തി പിടികൂടിയത്. കാറുടമയുടെ സമീപത്തെ വീട്ടിൽ നിന്നാണ് ഇതിനെ പിടികൂടിയത്.
ഓഗസ്റ്റ് രണ്ടാം തീയതി കോട്ടയം സ്വദേശിയായ സുജിത്ത് കാറുമായി നിലമ്പൂരിൽ പോയിരുന്നു. ആ സമയത്ത് പ്രദേശവാസികളായ ചിലർ ഇയാളുടെ കാറിൽ രാജവെമ്പാല കയറിയെന്ന് സംശയം പ്രകടിപ്പിച്ചിരുന്നു. അന്ന് കാർ പരിശോധിച്ചെങ്കിലും കണ്ടെത്താനായില്ല. കഴിഞ്ഞ ഞായറാഴ്ച പാമ്പിന്റെ പടം വീടിന് സമീപത്ത് നിന്നും കണ്ടെത്തി. തുടർന്ന് വാവ സുരേഷ് എത്തി പരിശോധിച്ചെങ്കിലും പാമ്പിനെ കണ്ടെത്താനായില്ല.
ഇന്ന് രാവിലെ വീടിന് സമീപത്ത് പാമ്പിനെ കണ്ടുവെന്ന് ആളുകൾ പറഞ്ഞതോടെയാണ് വനംവകുപ്പ് ഉദ്യോഗസ്ഥരെ വിവരം അറിയിച്ചത്. തുടർന്ന് ഉദ്യോഗസ്ഥരെത്തി പാമ്പിനെ പിടികൂടുകയായിരുന്നു.
കഴിഞ്ഞ ഒരു മാസമായി പാമ്പ് കാറിൽ തന്നെ ഉണ്ടായിരുന്നു എന്നാണ് സുജിത്ത് പറയുന്നത്. പലതവണ തനിക്ക് സംശയം തോന്നിയിരുന്നെന്നും സുജിത്ത് വ്യക്തമാക്കി. ഇത് ഇഴഞ്ഞ് അയൽവാസിയുടെ പുരയിടത്തിൽ പോയതാകാം എന്ന് സംശയിക്കുന്നു.
