മലയാളക്കരയിൽ നിരവധി ആരാധകരുള്ള താരമാണ് ജയസൂര്യ. അദ്ദേഹത്തിന്റെ പിറന്നാൾ ദിനമായ ഇന്ന് നിരവധി പേരാണ് താരത്തിന് ജന്മദിനാശംസകൾ നേർന്നത്. എന്നാൽ ഇപ്പോൾ സമൂഹമാദ്ധ്യമത്തിൽ ഏറെ ശ്രദ്ധ നേടുന്നത് ലാലേട്ടൻ ജയസൂര്യയ്ക്ക് നേർന്ന ജന്മദിനാശംസകളാണ്. പിറന്നാൾ ആശംസയ്ക്കൊപ്പം ജയസൂര്യയുടെ കത്തനാർ എന്ന ചിത്രത്തിനും അദ്ദേഹം ആശംസ നൽകുന്നുണ്ട്.
തന്റെ ഫേസ്ബുക്കിലൂടെ കത്തനാർ എന്ന സിനിമയുടെ പോസറ്ററെന്നോണം പുറത്തിറക്കിയ ഫോട്ടോയിൽ ഹാപ്പി ബർത്ത് ഡേ ജയസൂര്യ എന്ന് രേഖപ്പെടുത്തിയ ചിത്രം പങ്കുവച്ചാണ് മോഹൻലാൽ ആശംസ അറിയിച്ചിരിക്കുന്നത്. മോഹൻലാലിന്റെ ആശംസയ്ക്ക് പിന്നാലെ ജയസൂര്യ നന്ദിയും അറിയിച്ചിട്ടുണ്ട്.
ഹോം എന്ന സിനിമയുടെ സംവിധായകൻ റോജിൻ തോമസ് സംവിധാനം ചെയ്യുന്ന ചിത്രമാണ് കത്തനാർ. 2021 ൽ പ്രഖ്യാപിച്ച ഈ ചിത്രത്തിൽ കടമറ്റത്ത് കത്തനാരുടെ വേഷത്തിലാണ് ജയസൂര്യ എത്തുന്നത്. ഇന്ത്യൻ സിനിമയിലെ ആദ്യ വെർച്വൽ പ്രൊഡക്ഷൻ ആണ് ചിത്രമെന്ന് അണിയറ പ്രവർത്തകർ പറയുന്നു. ശ്രീ ഗോകുലം മൂവിസിന്റെ ബാനറിൽ ഗോകുലം ഗോപാലൻ നിർമ്മിക്കുന്ന ചിത്രം ഏഴ് ഭാഷകളിലാവും തിയറ്ററുകളിലെത്തുക.
