ചെന്നൈ ആസ്ഥാനമായുള്ള പ്രമുഖ ആഭ്യന്തര ഇരുചക്ര വാഹന ബ്രാൻഡായ ടിവിഎസ് മോട്ടോർ കമ്പനിയുടെ ആരാധകരേറെയുള്ള സ്കൂട്ടറാണ് എൻടോർക്ക് 125 റേസ് എഡിഷൻ. ഇപ്പോൾ മോഡലിന്റെ ശ്രേണിയിലേയ്ക്ക് പുതിയ ഒരു കളർ ഓപ്ഷൻ കൂടി നൽകിയിരിക്കുകയാണ് ടിവിഎസ്. പുതിയ മറൈൻ ബ്ലൂ നിറത്തിൽ വാഹനം ഇനി ലഭ്യമാകും. പുതിയ കളർ വേരിയന്റിന് 87,011 രൂപയാണ് എക്സ്ഷോറും വില. കളർ ഓപ്ഷനിൽ മാറ്റം വരുത്തിയതല്ലാതെ വാഹനത്തിന് മറ്റ് മാറ്റങ്ങൾ കമ്പനി വരുത്തിയിട്ടില്ല.
7,000 ആർപിഎമ്മിൽ 9.25 ബിഎച്ച്പിയും 5,500 ആർപിഎമ്മിൽ 10.5 എൻഎമ്മും പുറപ്പെടുവിക്കുന്ന 124.8 സിസി ത്രീ-വാൽവ് എയർ കൂൾഡ് എഞ്ചിനാണ് എൻടോർക്കിന് കരുത്ത് പകരുന്നത്. 9 സെക്കന്റിനുള്ളിൽ 60 കിലോമീറ്റർ വേഗത കൈവരിക്കാൻ എൻടോർക്കിന് കഴിയുമെന്ന് കമ്പനി അവകാശപ്പെടുന്നു.
ടെലിസ്കോപ്പിക് ഫോർക്കുകളും മോണോ-ഷോക്കും സസ്പെൻഡ് ചെയ്ത 12 ഇഞ്ച് വീലാണ് എൻടോർക്കിന് നൽകിയിരിക്കുന്നത്. മുൻവശത്ത് ഒരു ഡിസ്കും പിന്നിൽ ഒരു ഡ്രമ്മുമാണ് ബ്രേക്കിംഗ് കൈകാര്യം ചെയ്യുന്നത്. ടി ആകൃതിയിലുള്ള എൽഇഡി ഹെഡ്ലൈറ്റും ടെയിൽ ലാമ്പും ബ്ലൂടൂത്ത് ഘടിപ്പിച്ച ഡിജിറ്റൽ ഇൻസ്ട്രുമെന്റ് ക്ലസ്റ്ററും യുഎസ്ബി ചാർജറും വാഹനത്തിന് ലഭിക്കുന്നു. പുതിയ പെയിന്റ് സ്കീമിനായുള്ള ബുക്കിംഗ് ആരംഭിച്ചിട്ടുണ്ട്. കുറച്ച് ദിവസങ്ങൾക്കുള്ളിൽ തന്നെ വാഹനത്തിന്റെ ഡെലിവറി സാധ്യമാകുമെന്ന് കമ്പനി പറയുന്നു.
