യോഗയുടെ ഉത്ഭവസ്ഥാനമാണ് ഇന്ത്യ. ഭാരതത്തിന്റെ പുരാതന ശാരീരിക-ആത്മീയ പരിശീലനമായ യോഗ പഠിക്കാൻ ലോകമെമ്പാടുമുള്ള ജനങ്ങൾ ഭാരതത്തിന്റെ മണ്ണിലേയ്ക്ക് വരുന്നുണ്ട്. പ്രാപഞ്ചിക ഉണ്മയിൽ വ്യക്തിഗതമായ ഉണ്മയുടെ ലയനം എന്ന അർത്ഥമാണ് സംസ്കൃതത്തിലെ “യുജ്”എന്ന പദത്തിൽ നിന്ന് ഉത്ഭവിച്ച ‘യോഗ’യ്ക്കുള്ളത്. 5000 വർഷം പഴക്കമുള്ള ഒരു ഭാരതീയ ജ്ഞാനമാണിത്. നമ്മുടെ പൂർവ്വികരായ ഋഷിമാർ ദീർഘകാലത്തെ ധ്യാന-മനനാദികളാൽ നേടിയെടുത്ത വിജ്ഞാനമാണ് യോഗ. യോഗാഭ്യാസങ്ങളും സംസ്കാരവും കൊണ്ട് ഭാരതത്തിൽ പ്രസിദ്ധമായ ചില സ്ഥലങ്ങളുണ്ട്. യോഗാചാര്യൻമാർ നിർദ്ദേശിക്കുന്ന ഭാരതത്തിലെ അഞ്ച് സ്ഥലങ്ങൾ ഏതൊക്കെയാണെന്ന് നോക്കാം,
1. ഹിമാചൽ പ്രദേശ്
പടിഞ്ഞാറൻ ഹിമാലയത്തിൽ സ്ഥിതി ചെയ്യുന്ന ഹിമാചൽ പ്രദേശ് ഉത്തരേന്ത്യയിലെ അതിശയിപ്പിക്കുന്ന ഒരു സംസ്ഥാനമാണ്. ഇന്ത്യയിലെ ഏറ്റവും മനോഹരമായ സംസ്ഥാനങ്ങളിലൊന്നാണ് ഇത്. പ്രകൃതിയുടെ മനോഹാരിത, മഞ്ഞുമൂടിയ പർവതങ്ങൾ, വർഷം മുഴുവനും നിറഞ്ഞു കവിയുന്ന നദികൾ, സമൃദ്ധമായ വനങ്ങൾ, അഗാധമായ മലയിടുക്കുകൾ എന്നിവയാൽ സമ്പന്നമാണ് ഹിമാചൽ പ്രദേശ്. ഹിമാലയം ശക്തവും ദൈവീകവുമായ നിരവധി ഊർജ്ജങ്ങളുടെ ഉറവിടമാണ്. യോഗയെ കുറിച്ചുള്ള അറിവ്, ആത്മീയത, സാർവത്രിക രഹസ്യങ്ങൾ എന്നിങ്ങനെയെല്ലാം ഹിമാലയത്തിൽ ലയിച്ചിരിക്കുന്നു. ബിജിലി മഹാദേവ ക്ഷേത്രം, സിയോൾസർ തടാകം, ചന്ദ്ര താൽ തുടങ്ങിയ സ്ഥലങ്ങൾ ഇവിടെയുണ്ട്. വ്യാസൻ, മാർക്കണ്ഡേയ മുനി, ഋഷി ശ്രിംഗ്, അഗസ്ത്യ മുനി തുടങ്ങിയ മുനിമാർ ഉപയോഗിച്ചിരുന്നു എന്ന് കരുതപ്പെടുന്ന നിരവധി ഗുഹകളാൽ നിറഞ്ഞ സംസ്ഥാനമാണ്.
2. ഋഷികേശ്
“ലോകത്തിന്റെ യോഗ തലസ്ഥാനം” എന്ന് വിശേഷിപ്പിക്കപ്പെടുന്ന ഋഷികേശ് സന്ദർശിക്കുക എന്നത് യോഗയെ സ്നേഹിക്കുന്നവരുടെയും യാത്ര ഇഷ്ടപ്പെടുന്നവരുടെയും ഭാരതീയ സംസ്കാരത്തിൽ അഭിമാനിക്കുകയും ചെയ്യുന്നവരുടെ ആഗ്രഹമാണ്. വടക്കൻ സംസ്ഥാനമായ ഉത്തരാഖണ്ഡിലെ ഒരു നഗരമായ ഋഷികേശ് ഹിമാലയ പർവതനിരകളോട് ചേർന്ന് കിടക്കുന്നു. സഞ്ചാരികൾക്ക് മറക്കാനാവാത്ത മനോഹര കാഴ്ചകൾ സമ്മാനിക്കാൻ ഋഷികേശിന് സാധിക്കും. ലക്ഷ്മൺ ജൂല, രാംചൂല, അളകനന്ദ, തുംഗനാഥ്, ബദരിനാഥ് തുടങ്ങിയവ ഋഷികേശിലെ വളരെ പ്രശസ്തമായ സ്ഥലങ്ങളാണ്.
3. ഗോവ
തെക്കൻ തീരദേശ സംസ്ഥാനമായ ഗോവ യാത്രികർ ഏറെ ഇഷ്ടപ്പെടുന്ന ഒന്നാണ്. കടൽത്തീരങ്ങളാൽ സമ്പന്നമായ നാടാണ് ഗോവ. ഉല്ലാസയാത്രയ്ക്ക് പോകുന്നവർക്ക് മാത്രമല്ല, യോഗയെ ഇഷ്ടപ്പെടുന്നവർക്കും ധ്യാനിക്കാൻ താൽപ്പര്യമുള്ളവർക്കും എറ്റവും നല്ല സ്ഥലമാണ് ഗോവ. പരശുരാമന്റെ നാടായതിനാൽ ഗോവയുടെ മണൽത്തരികൾ പോലും ധന്യമാണ്. ആത്മീയതയ്ക്കും യോഗയ്ക്കും അനുയോജ്യമായ മണ്ണാണ് ഗോവയുടേതെന്ന് യോഗാചാര്യന്മാർ പറയുന്നു.
4. കാശി
3,000 വർഷത്തെ ചരിത്രമുള്ള വാരണാസി, ബനാറസ് അല്ലെങ്കിൽ കാശി എന്നത് യോഗാഭ്യാസ കേന്ദ്രവും ഒരു പ്രധാന ഹൈന്ദവ ആരാധനാലയവും കൂടിയാണ്. ഒരു പ്രശസ്തമായ തീർത്ഥാടന കേന്ദ്രം എന്നതിലുപരി വാരണാസി നിഗൂഢത, ആത്മീയത, ആയുർവേദം എന്നിവയുടെ ഒരു പ്രധാന കേന്ദ്രമാണ്. ഏറ്റവും പഴക്കം ചെന്ന നഗരങ്ങളിലൊന്നായ ഇത് അറിവിന്റെ നിധിയാണ്. ലോകമെമ്പാടുമുള്ള ആളുകളെ ആകർഷിക്കുന്ന വ്യത്യസ്തമായ ഊർജ്ജം ഈ മണ്ണിൽ അടങ്ങിയിരിക്കുന്നു. ഇവിടുത്തെ അറിവും വേദഗ്രന്ഥങ്ങളും യോഗികളെ വാരണാസിയുടെ മണ്ണിലേയ്ക്ക് കൊണ്ടുവരുന്നതിൽ പ്രധാനമാണ്. ഒരു ആത്മീയ തലസ്ഥാനമായി കാശിയെ ഭാരതീയർ ഉൾക്കൊള്ളുന്നു.
5. തമിഴ്നാട്
തമിഴ്നാടിന് യോഗയുമായും ആത്മീയതയുമായും പുരാതനമായ ബന്ധമുണ്ട്. ആത്മീയ പണ്ഡിതനും പ്രബുദ്ധനുമായ അഗസ്ത്യ മുനി എഴുതിയ യോഗയെയും ആത്മീയതയെയും കുറിച്ചുള്ള വിവരങ്ങൾ തമിഴിൽ രചിച്ചിരിക്കുന്ന ദക്ഷിണേന്ത്യയിലെ പുരാതന ഗ്രന്ഥങ്ങളിൽ അടങ്ങിയിരിക്കുന്നു. യോഗയെക്കുറിച്ചും ഇന്ത്യയുടെ പുരാതന സംസ്കാരത്തെക്കുറിച്ചും പഠിക്കാൻ താൽപ്പര്യമുള്ളവർക്ക് ആത്മീയാനുഭൂതി നൽകുന്ന മധുര, വൈദീശ്വരൻ കോവിൽ തുടങ്ങിയ സ്ഥലങ്ങൾ തമിഴ്നാട്ടിലുണ്ട്.
Comments