ടാറ്റയുടെ ഏറെ ജനപ്രിയമായ മോഡലാണ് ടിയാഗോ. ഇപ്പോൾ, ടിയാഗോയുടെ ഇലക്ട്രിക് കാർ പുറത്തിറക്കിയിരിക്കുകയാണ് ടാറ്റ. ഇന്ത്യൻ ഇലക്ട്രിക് കാർ വിപണിയിൽ ഏറ്റവും വില കുറഞ്ഞ മോഡലാണ് ടിയാഗോ. സാധാരണക്കാർക്ക് താങ്ങാവുന്ന വാഹനം പുറത്തിറക്കിയതിന്റെ സന്തോഷത്തിലാണ് വാഹന പ്രേമികൾ. 8.49 ലക്ഷം രൂപയാണ് വാഹനത്തിന്റെ എക്സ്ഷോറും വില. ടിയാഗോ ഇവി സാധാരണക്കാർക്കും താങ്ങാനാവുന്ന വാഹനമെന്നിരിക്കെ, ലോകത്തിലെ തന്നെ വില കുറഞ്ഞ ഇലക്ട്രിക് കാറാണോ ടിയാഗോ എന്ന് ചിലർ സമൂഹമാദ്ധ്യമങ്ങളിൽ തിരക്കുന്നുണ്ട്.
എന്നാൽ ടിയാഗോ ലോകത്തിലെ ഏറ്റവും വില കുറഞ്ഞ ഇവി അല്ല. ചൈനയിൽ വില കുറഞ്ഞ ഇലക്ട്രിക് വാഹനങ്ങൾ ധാരാളമുണ്ട്. ചൈനയിലെ പ്രദേശിക വാഹന നിർമ്മാതാക്കൾ ബാറ്ററിയിൽ പ്രവർത്തിക്കുന്ന കാറുകൾ ധാരാളമായി ഇറക്കുന്നുണ്ട്. ചംഗ്ലി എന്ന ചൈനീസ് വാഹന കമ്പനി അതേപേരിൽ ഒരു ഇലക്ട്രിക് കാർ നിർമ്മിക്കുന്നു. ഇതാണ് ഏറ്റവും വില കുറഞ്ഞ ഇലക്ട്രിക് കാറായി വിലയിരുത്തപ്പെടുന്നത്. ഈ വാഹനത്തിന് ഏകദേശം 75000 രൂപ വില വരും. എന്നാൽ ടാറ്റയുടെ ടിയാഗോയുമായി ചംഗ്ലി ചൈനീസ് വാഹനത്തെ ഒരു തരത്തിലും താരതമ്യപ്പെടുത്താൻ കഴിയില്ല. അങ്ങനെ താരതമ്യപ്പെടുത്തിയാൽ അന്യായമെന്ന് പറയേണ്ടി വരും.
വില കുറവെന്നത് പോലെ കാറിന്റെ സുരക്ഷയിലും കരുത്തിലും ഗുണമേന്മയിലും അടക്കം ചംഗ്ലി വളരെ പിന്നാലാണ്. ഒരു കൂട്ടം ലെഡ്-ആസിഡ് ബാറ്ററി ഉപയോഗിച്ചാണ് ഈ വാഹനം പ്രവർത്തിക്കുന്നത്. അതേസമയം, യഥാർത്ഥ ഇലക്ട്രിക് കാറുകളുടെ നിരയിൽ ടിയാഗോ ഇവിയ്ക്ക് സ്ഥാനം ലഭിച്ചേക്കാം. ചൈനീസ് നിർമ്മാതാക്കളുടെ വാഹനങ്ങൾ ഒഴിച്ചു നിർത്തിയാൽ, ലോകത്തിലെ ഏറ്റവും വില കുറഞ്ഞ ചില ഇലക്ട്രിക് കാറുകളുടെ നിരയിൽ ടിയാഗോ ഇവി കയ്യടി നേടും. ലോകത്തിലെ ഏറ്റവും വില കുറഞ്ഞ ഇലക്ട്രിക് കാറുകളുടെ നിരയിൽ ഒന്നാണ് സ്കോഡ CITIGOe iV . ഇതിന്റെ വില ഏകദേശം 15000 പൗണ്ട്(13 ലക്ഷം) രൂപയാണ്. ചെക്ക് നിർമ്മാതാക്കൾ പുറത്തിറക്കുന്ന ആദ്യ കാറാണിത്. പിന്നെയുള്ളത് SEAT eMii Electric ആണ്. ഇതിന്റെ വില ഏകദേശം 16000 പൗണ്ട്( 13.86 ലക്ഷം) ആണ്. സ്കോഡ CITIGOe iV റീബാഡ്ജ് ചെയ്ത പതിപ്പാണ് ഈ വാഹനം. ഫോക്സവാഗൺ e‑up! വാഹനങ്ങളും വില കുറവിൽ വാഗ്ദനം ചെയ്യുന്ന ഇലക്ട്രിക് വാഹനമാണ്. ഇതിന്റെ വില വിപണിയിൽ 20,000 പൗണ്ടും(17.31 ലക്ഷം) ആണ്.
Comments