സിനിമാ പ്രേമികൾ ഏറെ പ്രതീക്ഷയോടെ കാത്തിരിക്കുന്ന ചിത്രങ്ങളിലൊന്നാണ് പ്രഭാസ് നായകനായ ആദിപുരുഷ്. സിനിമയുടെ പ്രഖ്യാപനം മുതൽ ശ്രദ്ധ നേടിയ ചിത്രത്തിന്റെ ഫസ്റ്റ് ലുക്ക് പോസ്റ്റർ അണിയറ പ്രവർത്തകർ പുറത്തു വിട്ടു. ഓം റാവത്ത്‌ സംവിധാനം ചെയ്യുന്ന ആദിപുരുഷ് രാമായണത്തിന്റെ ആധുനിക പുനരാഖ്യാനമാണ്. ചിത്രത്തിൽ രാമനായിട്ടാണ് പ്രഭാസ് എത്തുന്നത്. ‘യുപിയിലെ അയോദ്ധ്യയിൽ സരയു നദിക്കരയിൽ നിന്നും ഒരു മാന്ത്രിക യാത്ര ആരംഭിക്കുമ്പോൾ ഞങ്ങളോടൊപ്പം നിങ്ങളും ചേരൂ’ എന്ന കുറിപ്പോടെയാണ് ആദിപുരുഷിന്റെ ഫസ്റ്റ് ലുക്ക് പോസ്റ്റർ നടൻ പ്രഭാസ് സമൂഹമാദ്ധ്യമങ്ങളിൽ പങ്കുവെച്ചിരിക്കുന്നത്. ‘തിന്മയുടെ മേൽ നന്മയുടെ വിജയം ആഘോഷിക്കുന്നു’ എന്ന വാക്യത്തോടെയാണ് പോസ്റ്റർ പുറത്തിറക്കിയിരിക്കുന്നത്. ചിത്രത്തിന്റെ ആദ്യ ടീസർ ഒക്ടോബർ 2-ന് അണിയറ പ്രവർത്തകർ പുറത്തുവിടും.
ഭഗവാൻ രാമനായി പ്രഭാസ് വേഷമിടുമ്പോൾ രാവണനായി സെയ്ഫ് അലി ഖാനാണ് എത്തുക. സീതയായി കൃതി സനോൻ, ലക്ഷ്മണനായി സണ്ണി സിംഗ്, ഹനുമാൻ ആയി ദേവദത്ത നാഗേ എന്നിവരും വേഷമിടുന്നു. ഇവരെ കൂടാതെ വത്സൽ ഷേത്ത്, സോണാൽ ചൗഹാൻ, തൃപ്തി തോരാദ്മൽ എന്നിങ്ങനെ വലിയ താരനിരയും ചിത്രത്തിൽ അണിനിരക്കുന്നു. രാവണൻ തട്ടികൊണ്ടുപോയ സീത ദേവിയെ രക്ഷിച്ച് തിരികെ എത്തിക്കുന്ന ഭാഗമാണ് ആദിപുരുഷനിൽ ദൃശ്യവത്കരിക്കുന്നത്. പീരിയഡ് ആക്ഷൻ ചിത്രമായ തൻഹാജിയ്‌ക്ക് ശേഷം ഓം റാവത്ത്‌ സംവിധാനം ചെയ്യുന്ന ചിത്രമാണ് ആദിപുരുഷ്. ഇതുവരെ നിർമ്മിച്ചതിൽ വച്ച് ഏറ്റവും ചെലവേറിയ ഇന്ത്യൻ ചിത്രമാണ് ആദിപുരുഷ്. 500 കോടിയിലധികം മുതൽ മുടക്കിയാണ് ഈ ബ്രഹ്മാണ്ഡ ചിത്രം ഒരുക്കുന്നത്.
100-ലധികം ദിവസങ്ങൾ കൊണ്ടാണ് ആദിപുരുഷ് ചിത്രീകരിച്ചരിക്കുന്നത്. ഭൂഷൺ കുമാർ, കൃഷൻ കുമാർ, ഓം റാവത്ത്‌, പ്രസാദ് സുതാർ, രാജേഷ് നായർ എന്നിവർ ചേർന്ന് നിർമ്മിക്കുന്ന ചിത്രം ടി-സീരീസ് ഫിലിംസാണ് തിയറ്റുകളിലെത്തിക്കുന്നത്. കാർത്തിക് പളനി ചിത്രത്തിന്റെ ഛായാഗ്രഹണം നിർവ്വഹിക്കുന്നു. സച്ചേത് ടണ്ടനും പരമ്പര ടണ്ടനും ചേർന്നാണ് സംഗീതം നൽകുന്നത്. ഹിന്ദി, തെലുങ്ക്, കന്നട, തമിഴ്, മലയാളം എന്നിങ്ങനെ അഞ്ച് ഭാഷകളിലാണ് ആദിപുരുഷ് എത്തുക. 2023 ജനുവരി 12-ന് ചിത്രം റിലീസ് ചെയ്യും.
