ഒരു എസ് ക്ലാസ് വാഹനം ഓടിച്ച് റോഡിലൂടെ വരുമ്പോൾ പെട്ടെന്ന് ട്രാഫിക് ബ്ലോക് ഉണ്ടായാൽ നിങ്ങൾ എന്ത് ചെയ്യും? മേഴ്സിഡസ് ബെൻസ് സിഇഒയാണ് ഈ ചോദ്യം ചോദിച്ചത്. സാധാരണയായി നമ്മൾ ബ്ലോക് കഴിയുന്നത് വരെ വാഹനത്തിൽ ഇരിക്കുകയാണ് പതിവ്. എന്നാൽ അദ്ദേഹം ചെയ്തത് അതൊന്നുമായിരുന്നില്ല. നേരെ വാഹനത്തിൽ നിന്നിറങ്ങി നടന്ന് ഒരു ഓട്ടോറിക്ഷയിൽ കയറി.
മെഴ്സിഡസ്-ബെൻസ് ഇന്ത്യയുടെ സിഇഒ മാർട്ടിൻ ഷ്വെങ്ക് പൂനെയിലൂടെ മേഴ്സിഡസ് എസ് ക്ലാസ് യാത്ര ചെയ്യുന്നതിനിടെയായിരുന്നു സംഭവം. അപ്രതീക്ഷിതമായി ട്രാഫിക്കിൽ കുടുങ്ങി. ഏറെ നേരം കാത്തെങ്കിലും ട്രാഫിക് കുരുക്ക് മാറാതായതോടെ അദ്ദേഹം വാഹനം പാർക്ക് ചെയ്ത് നടക്കാൻ ആരംഭിച്ചു. കിലോമീറ്ററുകൾ നടന്ന് ഒരു ഓട്ടോറിക്ഷയിൽ കയറി ലക്ഷ്യസ്ഥാനത്ത് എത്തി.
ഇൻസ്റ്റഗ്രാമിൽ പങ്കുവെച്ച കുറിപ്പിലൂടെ അദ്ദേഹം തന്നെയാണ് ഇക്കാര്യം വ്യക്തമാക്കിയത്. ഓട്ടോയിൽ യാത്ര ചെയ്യുന്നതിന്റെ ഫോട്ടോയും സിഇഒ പങ്കുവെച്ചിട്ടുണ്ട്.
ചിത്രം പ്രചരിച്ചതോടെ പ്രതികരണവുമായി നിരവധി പേരാണ് രംഗത്തെത്തിയിരിക്കുന്നത്. ട്രാഫിക്കിൽ അകപ്പെട്ടാൽ എല്ലാവരുടെയും അവസ്ഥ ഇത് തന്നെയാണ് എന്ന പ്രതികരണങ്ങളാണ് ഫോട്ടോയ്ക്ക് ലഭിക്കുന്നത്.
