തന്റെ പുതിയ ചിത്രമായ റാമിന്റെ ചിത്രീകരണത്തിലാണ് മലയാളികളുടെ പ്രിയ താരം മോഹൻലാൽ. ജീത്തു ജോസഫ് സംവിധാനം ചെയ്യുന്ന റാമിന്റെ ചിത്രീകരണത്തിനായി മോഹൻലാൽ ഇപ്പോൾ യുകെയിലാണ് ഉള്ളത്. താരത്തെ സംബന്ധിച്ച എല്ലാ വാർത്തകളും സമൂഹമാദ്ധ്യമത്തിൽ തരംഗം സൃഷ്ടിക്കാറുണ്ട്. മാത്രമല്ല തന്റെ പാചക പരീക്ഷണങ്ങൾ സമൂഹ മാദ്ധ്യമങ്ങളിലൂടെ താരം പങ്കുവയ്ക്കാറുമുണ്ട്.
ഇപ്പോഴിതാ അത്തരത്തിലൊരു പാചകത്തിന്റെ ചിത്രമാണ് സമൂഹമാദ്ധ്യമങ്ങളിൽ പ്രചരിക്കുന്നത്. റാം ചിത്രീകരണത്തിനിടെ ലഭിച്ച ഒഴിവു സമയം സഹപ്രവർത്തകർക്കായി പുതിയ വിഭവം പാചകം ചെയ്യുന്ന തിരക്കിലാണ് താരം. വിഭവം ആസ്വദിക്കാൻ ആവേശത്തോടെ കാത്തിരുന്ന ഇന്ദ്രജിത്ത് ഉൾപ്പെടെയുള്ള സഹതാരങ്ങളെയും ചിത്രത്തിൽ കാണാൻ സാധിക്കുന്നു. ഇന്ദ്രജിത്താണ് ഇൻസ്റ്റാഗ്രാമിലൂടെ മോഹൻലാൽ പാചകം ചെയ്യുന്ന ചിത്രം പുറത്ത് വിട്ടത്.
മൂന്ന് വർഷത്തിന് ശേഷമാണ് മോഹൻലാൽ -ജിത്തു ജോസഫ് കൂട്ടുകെട്ടിൽ ഒരു ചിത്രം ഒരുങ്ങുന്നത്. തൃഷ കൃഷ്ണൻ, ഇന്ദ്രജിത്ത് സുകുമാരൻ, സംയുക്ത മേനോൻ എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നു. ലോകത്തെ ആറ് വ്യത്യസ്ത സ്ഥലങ്ങളിൽ നടക്കുന്ന കൊലപാതകങ്ങളുടെ പരമ്പര അന്വേഷിക്കുന്ന ഇന്ത്യൻ റോ ഏജന്റായ രാം മോഹൻ ഐപിഎസായാണ് മോഹൻലാൽ ചിത്രത്തിൽ എത്തുന്നത്. രണ്ട് ഭാഗങ്ങളായി പുറത്തിറങ്ങുന്ന ചിത്രം മറ്റു ഭാഷകളിലേക്കും മൊഴിമാറ്റം ചെയ്യപ്പെടുമെന്ന റിപ്പോർട്ടുകളും മുൻപ് പുറത്ത് വന്നിരുന്നു.
Comments