ഗുവാഹട്ടി: ദക്ഷിണാഫ്രിക്കക്കെതിരായ രണ്ടാം ട്വന്റി 20 മത്സരത്തിൽ ഇന്ത്യക്ക് ഗംഭീര തുടക്കം. ടോസ് നഷ്ടമായി ബാറ്റിംഗിനയക്കപ്പെട്ട ഇന്ത്യ പവർപ്ലേ പൂർത്തിയാകുമ്പോൾ വിക്കറ്റ് നഷ്ടമില്ലാതെ 57 റൺസെടുത്തു. നിലവിൽ 7 ഓവറിൽ വിക്കറ്റ് പോകാതെ 68 റൺസ് എന്ന നിലയിലാണ് ഇന്ത്യ. 15 പന്തിൽ 33 റൺസുമായി കെ എൽ രാഹുലും 27 പന്തിൽ 31 റൺസുമായി രോഹിത് ശർമ്മയും ബാറ്റിംഗ് തുടരുന്നു.
ട്വന്റി 20 പരമ്പരയിലെ ആദ്യ മത്സരത്തിൽ ദക്ഷിണാഫ്രിക്കക്കെതിരെ ഇന്ത്യ 8 വിക്കറ്റിന്റെ തകർപ്പൻ ജയം നേടിയിരുന്നു. ബൗളിംഗിലും ഫീൽഡിംഗിലും ഒരേ പോലെ മികവ് പുലർത്തിയായിരുന്നു മത്സരത്തിൽ ഇന്ത്യ വിജയിച്ചത്. ഇന്ന് ജയിച്ചാൽ ഇന്ത്യക്ക് പരമ്പര സ്വന്തമാക്കാം. പരമ്പരയിലെ അവസാന മത്സരം ഒക്ടോബർ 4ന് ഇൻഡോറിലാണ്.
ട്വന്റി 20 ലോകകപ്പിനുള്ള മുന്നൊരുക്കങ്ങൾ പരിശോധിക്കാനുള്ള അവസരമായാണ് ഇരു ടീമുകളും പരമ്പരയെ കാണുന്നത്. ഒക്ടോബർ 16ന് ഓസ്ട്രേലിയലിലാണ് ട്വന്റി 20 ലോകകപ്പ് ആരംഭിക്കുന്നത്.
