മമ്മൂട്ടി എന്ന നടന്റെ വസ്ത്രധാരണവും ലുക്കും എല്ലാം തന്നെ ആരാധകർക്കിടയിൽ എന്നും ഒരു ചർച്ചാ വിഷയമാണ്. സിനിമകൾക്ക് പുറമെ പൊതു വേദികളിലും വളരെ സ്റ്റൈലിഷായിയാണ് അദ്ദേഹം എത്താറുള്ളത്. അത്തരത്തിൽ ആരാധകരുടെ ശ്രദ്ധ പിടിച്ച് പറ്റിയ ഒന്നായിരുന്നു മോഹൻലാലിന്റെ ആദ്യ സംവിധാന സംരഭമായ ബറോസിന്റെ ലോഞ്ചിന് മമ്മൂട്ടി ധരിച്ചിരുന്ന കൂളിംഗ് ഗ്ലാസ്. ഇപ്പോഴിതാ ഈ ഗ്ലാസിന് പിന്നിലെ ഒരു നൊസ്റ്റാൾജിയ പങ്കുവച്ചിരിക്കുകയാണ് പ്രേക്ഷകരുടെ പ്രിയതാരം മമ്മൂട്ടി.
ബറോസിന്റെ പൂജയ്ക്ക് വച്ച കൂളിംഗ് ഗ്ലാസിന് കുറെ വർഷത്തെ പഴക്കം ഉണ്ട്.. അതായത് മോഹൻലാലിന്റെ കല്യാണത്തിന് വച്ച അതെ ഗ്ലാസാണ് അദ്ദേഹം സംവിധാനം ചെയ്യുന്ന ചിത്രത്തിന്റെ ലോഞ്ചിനും വച്ചത്. മമ്മൂട്ടിയുടെ പുതിയ ചിത്രമായ റോഷാക്കിന്റെ പ്രമോഷന്റെ ഭാഗമായി നടന്ന പരിപാടിയിലാണ് അദ്ദേഹം ഇക്കാര്യം വ്യക്തമാക്കിയത്.
പ്രേക്ഷകർ ഏറെ ആകാംക്ഷയോടെ കാത്തിരിക്കുന്ന മമ്മൂട്ടി ചിത്രമാണ് റോഷാക്ക്. കെട്ട്യോളാണ് എന്റെ മാലാഖ ഫെയിം നിസാം ബഷീറാണ് ചിത്രം സംവിധാനം ചെയ്യുന്നത് . അമ്പരപ്പിന്റെയും ഭയത്തിന്റെയും ഭാവങ്ങൾ നിറച്ച് പുറത്തിറങ്ങിയ ചിത്രത്തിന്റെ പോസ്റ്ററുകളും വീഡിയോകളും പ്രേക്ഷകരിൽ ആകാംക്ഷ കൂട്ടിയിരിക്കുകയാണ്. മമ്മൂട്ടിയുടെ നിർമ്മാണ സംരംഭമായ മമ്മൂട്ടി കമ്പനി ആണ് ചിത്രം നിർമ്മിക്കുന്നത്. ചിത്രത്തിൽ നടൻ ആസിഫലി അതിഥി വേഷത്തിൽ എത്തുന്നുണ്ട്. ചിത്രത്തിൽ മമ്മൂട്ടിയെയും സഞ്ജു ശിവ്റാമിനെയും ആസിഫ് അലിയെയും കൂടാതെ ഷറഫുദ്ധീൻ, ജഗദീഷ്, ഗ്രേസ് ആന്റണി, ബിന്ദു പണിക്കർ, കോട്ടയം നസീർ, ബാബു അന്നൂർ , മണി ഷൊർണ്ണൂർ തുടങ്ങിയവരും അണിനിരക്കുന്നുണ്ട്.
