മുംബൈ; സിആർപിഎഫ് ജവാൻമാർക്കൊപ്പം ആയുധപൂജയിൽ പങ്കെടുത്ത് ബോളിവുഡ് താരം കങ്കണാ റണാവത്. മുംബൈയിലെ വസതിയിൽ നടത്തിയ പൂജയുടെ ചിത്രങ്ങൾ കങ്കണ ഇൻസ്റ്റഗ്രാം സ്റ്റോറീസ് ആയി പങ്കുവെച്ചു. തനിക്ക് സുരക്ഷയൊരുക്കുന്ന സിആർപിഎഫ് ജവാൻമാർക്കൊപ്പമായിരുന്നു കങ്കണ ആയുധപൂജയിൽ പങ്കെടുത്തത്.
2020 മുതൽ കേന്ദ്ര ആഭ്യന്തരമന്ത്രാലയം കങ്കണയ്ക്ക് വൈ പ്ലസ് സുരക്ഷ നൽകുന്നുണ്ട്. സിആർപിഎഫ് ജവാൻമാർക്കൊപ്പമുളള ചിത്രങ്ങളും താരം പങ്കുവെച്ചിട്ടുണ്ട്. നിങ്ങൾ ഏത് മതത്തിൽപെട്ടവരാണെങ്കിലും നിങ്ങൾ ചെയ്യുന്ന ജോലി കൊണ്ട് ക്ഷത്രിയരാണെന്ന് കങ്കണ കുറിച്ചു. എല്ലായ്പോഴും വിജയം മാത്രം ഭവിക്കട്ടെയെന്ന ആശംസയോടെയാണ് സന്ദേശം അവസാനിപ്പിക്കുന്നത്.
പത്തിലധികം പേരടങ്ങുന്ന സായുധ സേനാംഗങ്ങളാണ് താരത്തിന് 24 മണിക്കൂറും ഊഴമിട്ട് സുരക്ഷ നൽകുന്നത്. ഇത് കൂടാതെ സ്വന്തം നിലയിലുളള പേഴ്സണൽ സെക്യൂരിറ്റി സ്റ്റാഫുകളും കങ്കണയ്ക്കുണ്ട്.
നേരത്തെ മുതൽ ദേശീയതയോട് ചേർന്ന് നിൽക്കുന്ന പ്രസ്താവനകളിലൂടെയും അഭിപ്രായങ്ങളിലൂടെയും സമൂഹമാദ്ധ്യമങ്ങളിൽ കൈയ്യടി നേടുന്ന താരമാണ് കങ്കണ. ഭീകരവാദത്തിനെതിരെ നിരന്തരം അഭിപ്രായങ്ങൾ പങ്കുവെയ്ക്കുന്ന നടി രാജ്യത്തെ സൈനികശക്തിയെ അഭിനന്ദിക്കുന്നതിൽ ഒട്ടും മടി കാണിക്കാറുമില്ല.
Comments