മിക്ക മലയാളികളും ചോറുണ്ണുന്നവരായതുകൊണ്ട് തന്നെ കേരളത്തിലെ ഒട്ടുമിക്ക വീടുകളിലും ദിവസേന ഉണ്ടാകുന്ന ഒന്നാണ് കഞ്ഞിവെള്ളം. ചിലപ്പോഴൊക്കെ ദാഹം ശമിക്കാൻ കഞ്ഞിവെള്ളം കുടിക്കുമെങ്കിലും മിക്കവരും ഇത് പാഴാക്കി കളയുകയാണ് പതിവ്. ഗുണങ്ങളാൽ സമ്പുഷ്ടമായ കഞ്ഞിവെള്ളത്തെ ഏതെങ്കിലും തെങ്ങിന്റെ ചുവിട്ടിലോ അല്ലെങ്കിൽ പാത്രം കഴുകുന്ന സിങ്കിൽ തന്നെയോ ഒഴുക്കിവിടുന്നതാണ് രീതി. എന്നാൽ ഇതുവായിച്ചാൽ നിങ്ങൾ പിന്നീടൊരിക്കലും കഞ്ഞിവെള്ളം പാഴാക്കില്ല..
ദിവസേന കഞ്ഞിവെള്ളം കുടിച്ചാലുള്ള ഗുണങ്ങൾ എന്തെല്ലാമാണെന്ന് നോക്കാം..
1. ദഹന പ്രക്രിയയെ സഹായിക്കുന്നു
ഭക്ഷ്യവിഷബാധ, വയറിളക്കം, ദഹനക്കേട് തുടങ്ങി ദഹനസംബന്ധമായ അസുഖങ്ങൾ ശമിപ്പിക്കാൻ കഞ്ഞിവെള്ളം കുടിക്കാമെന്ന് വിദഗ്ധർ ശുപാർശ ചെയ്യാറുണ്ട്. നമ്മുടെ കുടലിന്റെ ആരോഗ്യത്തിന് ആവശ്യമായ വിറ്റാമിനുകളും ധാതുക്കളും പ്രീബയോട്ടിക്കുകളും കഞ്ഞിവെള്ളത്തിൽ ധാരാളം അടങ്ങിയിട്ടുണ്ട്.
2. ഊർജ്ജം നൽകും
അരിയിൽ കാർബോഹൈഡ്രേറ്റ് അടങ്ങിയിട്ടുണ്ട്. അരി വേവിക്കുമ്പോൾ ഇത് വെള്ളത്തിലേക്ക് വ്യാപിക്കുന്നു. അതുകൊണ്ട് തന്നെ കഞ്ഞിവെള്ളം കുടിക്കുമ്പോൾ ശരീരത്തിന് ഊർജ്ജം ലഭിക്കും. രാവിലെ വെറുംവയറ്റിൽ കഞ്ഞിവെള്ളം കുടിച്ച് ദിവസം ആരംഭിച്ചാൽ അന്നേ ദിനം മുഴുവനും ശരീരത്തിനാവശ്യമായ ഊർജ്ജസ്വലതയുണ്ടാകും.
3. ശരീരത്തിൽ ജലാംശം നിലനിർത്തുന്നു
കടുത്ത വേനൽ കാലങ്ങളിൽ ശരീരത്തിൽ ജലാംശത്തിന്റെ അളവ് കുറയുന്നതും അതുവഴി പലരോഗങ്ങളും പിടിപെടുന്നതും സാധാരണമാണ്. എന്നാൽ ശരീരത്തിലെ ജലാംശത്തിന്റെ അളവ് നിലനിർത്തുന്നതിനുള്ള ഏറ്റവും ഫലപ്രദമായ മാർഗമാണ് കഞ്ഞിവെള്ളം. ഇതുവഴി നിർജ്ജലീകരണം തടയപ്പെടുന്നു. ഛർദ്ദിയോ പനിയോ പിടിപെടുമ്പോഴും കഞ്ഞിവെള്ളം കുടിക്കുന്നത് ഗുണം ചെയ്യും.
4. മുടി വളർച്ചയ്‌ക്ക്
കഞ്ഞി വെള്ളത്തിൽ മുടി കഴുകിയാൽ മുടിക്ക് തിളക്കവും മിനുസവും ഉണ്ടാകുമെന്നാണ് വിദഗ്ധർ പറയുന്നത്. ഒപ്പം മുടിയെ ശക്തിപ്പെടുത്തുകയും ചെയ്യുന്നു. മുടി നീളം വെക്കാനും കഞ്ഞിവെള്ളം സഹായിക്കും.
5. മൃദുലമായ ചർമ്മം നിലനിർത്തുന്നു
ചർമ്മത്തിന് ആവശ്യമായ വിറ്റാമിൻ എ, സി, കെ, മിനറലുകൾ, ആന്റിഓക്സിഡന്റുകൾ എന്നിവ ധാരാളമായി കഞ്ഞിവെള്ളത്തിലടങ്ങിയിട്ടുണ്ട്. അതിനാൽ വരണ്ട ചർമ്മം, മുഖക്കുരു തുടങ്ങിയ പ്രശ്നങ്ങളെ ചെറുക്കാൻ കഞ്ഞിവെള്ളം ഉപയോഗിക്കാവുന്നതാണ്. ഇതിനായി ഐസ് ട്രേയിലേക്ക് കഞ്ഞിവെള്ളം ഒഴിച്ച് തണുപ്പിക്കുക. ഈ ഐസ് ക്യൂബുകൾ മുഖത്ത് പുരട്ടുക. ഇത് മുഖത്തെ രക്തചംക്രമണം വർദ്ധിപ്പിക്കുന്നു.
Comments