ന്യൂഡൽഹി : വിദ്യാഭ്യാസ രംഗത്ത് എല്ലാവരും ഡൽഹി മാതൃക പിന്തുടരണമെന്ന് ആം ആദ്മി ദേശീയ കൺവീനറും മുഖ്യമന്ത്രിയുമായ അരവിന്ദ് കെജ് രിവാൾ. രാജ്യമെമ്പാടുമുള്ള സ്കൂളുകൾ വികസിപ്പിക്കുന്നതിനായി ഡൽഹി സർക്കാരുമായി സഹകരിച്ച് പ്രവർത്തിക്കണമെന്നും കെജ് രിവാൾ ആവശ്യപ്പെട്ടു. പ്രധാനമന്ത്രി നരേന്ദ്ര മോദിയോടാണ് ഡൽഹി മുഖ്യമന്ത്രി ഇക്കാര്യം ആവശ്യപ്പെട്ടത്.
അഞ്ച് വർഷം കൊണ്ട് ഡൽഹിയിലെ സ്കൂളുകളുടെ മുഖം മാറിയെന്നും എല്ലാ സ്ഥാപനങ്ങളും മികച്ച നിലവാരത്തിലേക്ക് എത്തിയെന്നുമാണ് കെജ് രിവാളിന്റെ വാദം. അതുപോലെ എല്ലാ സംസ്ഥാനങ്ങളും ഡൽഹിയുമായി സഹകരിച്ചാൽ അഞ്ച് വർഷം കൊണ്ട് വിദ്യാഭ്യാസ രംഗത്ത് രാജ്യത്തിന് മുന്നേറാനാകും എന്നും കെജ് രിവാൾ പറഞ്ഞു.
ഡൽഹിയിലെ വിദ്യാഭ്യാസ രംഗത്ത് വികസനം നടന്നുവെന്ന് വീരവാദം മുഴക്കിക്കൊണ്ട് നടക്കുന്ന കെജ് രിവാളിനെതിരെ നേരത്തെ തന്നെ വ്യാപക വിമർശനങ്ങൾ ഉയർന്നിട്ടുണ്ട്. കെട്ടിടത്തിന്റെ ഫോട്ടോ പ്രചരിപ്പിച്ച് സ്കൂൾ ഒരുങ്ങിയെന്നും വിദ്യാഭ്യാസ മേഖല കുതിക്കുന്നുവെന്നുമുളള പരസ്യപ്രചാരണങ്ങളാണ് ഡൽഹി സർക്കാർ നടത്തുന്നത്. തിരഞ്ഞെടുപ്പ് പ്രചാരണത്തിന്റെ ഭാഗമായും കെജ് രിവാൾ ഇത്തരം പ്രചാരണങ്ങൾ നടത്തിവരികയാണ്. എന്നാൽ ഇത്തരം വ്യാജ പ്രചാരണങ്ങളെ പൊളിച്ചടുക്കിക്കൊണ്ടാണ് ബിജെപി തെളിവുകൾ നിരത്തിയത്.
Comments