എന്നും കൗതുകം ഉണർത്തുന്ന ഒന്നാണ് കടൽ. എത്ര കണ്ടാലും മതിവരാത്ത ഒരു അത്ഭുതം. അതുപോലെ തന്നെ കൗതുകം ഉണർത്തുന്ന ഒന്നാണ് ഉൾക്കടലിലെ കാഴ്ചകൾ. നേരിൽ കാണാൻ സാഹചര്യങ്ങൾ അനുവദിക്കാത്തതിനാൽ പലരും ദൃശ്യങ്ങളിലൂടെ ഈ ഭംഗി ആസ്വദിക്കുകയാണ് ചെയ്യുന്നത്. ഇപ്പോഴിതാ അത്തരക്കാർക്ക് വീണ്ടും കൗതുകം ഉണർത്തുകയാണ് സമൂഹമാദ്ധ്യമങ്ങളിൽ പ്രചരിക്കുന്ന ഒരു വീഡിയോ.
കടലിൽ പൊങ്ങി കിടക്കുന്ന ഗ്ലാസ് നീരാളിയാണ് ദൃശ്യങ്ങളിൽ ഉള്ളത് . അപൂർവ്വമായ ഈ കാഴ്ച ട്വിറ്ററിൽ ദി ഓക്സിജൻ പ്രൊജക്റ്റ് എന്ന ഉപഭോക്താവാണ് പങ്കുവച്ചിരിക്കുന്നത്. പേര് പോലെ തന്നെയാണ് ഈ നീരാളി. കാഴ്ചക്കാരന് നീരാളിയുടെ കണ്ണുകളും ഞരമ്പുകളും അതിന്റെ ദഹനനാളവും മാത്രമെ കാണാൻ സാധിക്കുകയുള്ളൂ. സൂര്യ പ്രകാശം എത്തിപ്പെടാത്ത സമുദ്രത്തിന്റെ അടിത്തട്ടിലാണ് ഇവയെ പ്രധാനമായും കാണാൻ സാധിക്കുന്നത്. പലപ്പോഴും ആക്രമിക്കാൻ എത്തുന്നവരിൽ നിന്നും രക്ഷനേടാൻ ഗ്ലാസ് പ്രതലം അവയെ സഹായിക്കാറുണ്ട്.
ഇവിടെ ദൃശ്യങ്ങൾ പങ്കുവച്ച് കൊണ്ട് ഉപയോക്താവ് ഇങ്ങനെ കുറിച്ചു. ലോകമെമ്പാടുമുള്ള ഉഷ്ണ മേഖല ജലത്തിൽ കാണപ്പെടുന്ന ഒരു സെഫലോപോഡാണ് ഗ്ലാസ് നീരാളി . സൂര്യപ്രകാശം എത്തിപ്പെടാത്ത ഉൾക്കടലാണ് ഈ മനോഹാര ജീവിയുടെ വാസസ്ഥലം.
1918 വരെ ഗ്ലാസ് ഒക്ടോപസുകളെ കണ്ടു പിടിച്ചിട്ടില്ലെന്ന് ഇന്റർനാഷണൽ യൂണിയൻ ഫോർ കൺസർവേഷൻ ഓഫ് നേച്ചർ വ്യക്തമാക്കുന്നു. ഏകദേശം 2 മുതൽ 5 വർഷം വരെ ഇവ ജീവിക്കുമെന്നും ഇവർ അഭിപ്രായപ്പെടുന്നു. 19,000 ലധികം പേരാണ് ഇതിനോടകം ട്വിറ്ററിലൂടെ ദൃശ്യങ്ങൾ കണ്ടിരിക്കുന്നത്. നിവധി പേരാണ് അതിശയത്തോടെ ദൃശ്യങ്ങൾക്ക് കമന്റുകൾ നൽകുന്നത്.
