കണ്ണൂർ : കണ്ണൂരിൽ അമ്മയെ വെട്ടിപ്പരിക്കേൽപ്പിച്ച കേസിൽ ലഹരിക്കടിമയായ മകൻ അറസ്റ്റിൽ. വടക്കെ പൊയിലൂരിലാണ് സംഭവം. കൊളവല്ലൂർ പോലീസാണ് മകൻ നിഖിൽ രാജിനെ അറസ്റ്റ് ചെയ്തത്. ഇയാൾക്കെതിരെ വധശ്രമത്തിന് കേസെടുത്തിട്ടുണ്ട്.
ഇന്നലെ രാത്രിയോടെയായിരുന്നു സംഭവം. പട്ടിയെ വളർത്തുന്നതുമായി ബന്ധപ്പെട്ട തർക്കമാണ് അക്രമത്തിലെത്തിയത്. ഇയാൾ അമ്മ ജാനുവിന്റെ രണ്ട് കൈകളും വെട്ടിപ്പരിക്കേൽപ്പിക്കുകയായിരുന്നു. നിഖിൽ രാജ് വീട്ടിലെ സാധനങ്ങൾ നശിപ്പിക്കുകയും ഭീകരാന്തരീക്ഷം സൃഷ്ടിക്കുകയും ചെയ്തു. നാട്ടുകാർ വിവരമറിയിച്ചതിനെ തുടർന്നാണ് പോലീസ് എത്തിയത്. തുടർന്ന് ജാനുവിനെ ആശുപത്രിയിൽ പോലീസ് എത്തിക്കുകയായിരുന്നു.
ജാനുവിന്റെ രണ്ട് കൈകളിലും തുന്നലുണ്ട്. മകനെതിരെ പരാതി നൽകാൻ ജാനു തയ്യാറായിരുന്നില്ല. ഇതോടെ നിഖിൽ രാജിനെതിരെ കേസെടുക്കാനാകില്ല എന്നായിരുന്നു പോലീസ് നിലപാട്. എന്നാൽ ഇയാൾ സമീപവാസികൾക്കെല്ലാം ഭീഷണിയാണെന്നും പോലീസ് സ്വമേധയാ കേസെടുക്കണമെന്നും നാട്ടുകാർ ആവശ്യപ്പെട്ടു. തുടർന്നാണ് കേസ് രജിസ്റ്റർ ചെയ്തത്.
