ന്യൂഡൽഹി:ബ്രിട്ടണിലെ ആദ്യ ഇന്ത്യൻ വംശജനായ പ്രധാനമന്ത്രിയായി തിരഞ്ഞെടുക്കപ്പെട്ട ഋഷി സുനകിനെ അഭിനന്ദിച്ച് പ്രധാനമന്ത്രി നരേന്ദ്ര മോദി. ആഗോള പ്രശ്നങ്ങൾക്ക് ഒരുമിച്ച് പരിഹാരം കാണാൻ ആഗ്രഹിക്കുന്നതായും അദ്ദേഹം പറഞ്ഞു. യുകെയിലെ ഇന്ത്യൻ പൗരന്മാർക്ക് പ്രധാനമന്ത്രി ദീപാവലി ആശംസകളും അറിയിച്ചു.
Warmest congratulations @RishiSunak! As you become UK PM, I look forward to working closely together on global issues, and implementing Roadmap 2030. Special Diwali wishes to the 'living bridge' of UK Indians, as we transform our historic ties into a modern partnership.
— Narendra Modi (@narendramodi) October 24, 2022
പഞ്ചാബിൽ ജനിച്ച് ആദ്യം കിഴക്കൻ ആഫ്രിക്കയിലേക്കും പിന്നീട് ബ്രിട്ടിലേക്കും കുടിയേറിയവരാണ് സുനകിന്റെ പൂർവ്വികർ. യശ്വീർ സുനകിന്റെയും ഉഷയുടെയും മകനായി 1980-ൽ ഹാംഷറിലെ സതാംപ്റ്റണിലാണ് ഋഷി സുനകിന്റെ ജനനം. ബ്രിട്ടണിലെ ഓക്സ്ഫോർഡിലും യുഎസിലെ സ്റ്റാൻഫഡിലുമായിരുന്നു പഠനം. വൻകിട കമ്പനികളിൽ വരെ സ്വന്തമായി നിക്ഷേപ സഹായ കമ്പനി രൂപീകരിച്ചും മികച്ച രീതിയിൽ കരിയർ മുന്നോട്ട് കൊണ്ടുപോകുന്നതിനിടയിലാണ് രാഷ്ട്രീയത്തിലെത്തുന്നത്. 2014-ൽ കൺസർവേറ്റീവ് പാർട്ടിയിലൂടെ രാഷ്ട്രീയത്തിലെത്തിയ അദ്ദേഹം 2015-ൽ വിദേശകാര്യമന്ത്രിയായി. തുടർന്ന് ബോറിസിന്റെ കാലത്ത് ട്രഷറി ചീഫ് സെക്രട്ടറിയായും സേവനമനുഷ്ടിച്ചിട്ടുണ്ട്. ഇൻഫോസിസ് സ്ഥാപക ചെയർമാൻ നാരായണമൂർത്തിയുടെ മകൾ അക്ഷതയാണ് ഭാര്യ.
തിരഞ്ഞെടുപ്പിൽ നിന്ന് പെന്നി മോർഡന്റും പിൻമാറിയതോടെയാണ് പ്രധാനമന്ത്രി പദം ഋഷി സുനകിന് സ്വന്തമായത്. മത്സരത്തിൽ നിന്ന് മുൻ പ്രധാനമന്ത്രി ബോറിസ് ജോൺസൺ നേരത്തെ പിൻമാറിയിരുന്നു. ഇതിന് പിന്നാലെയാണ് പ്രധാന എതിരാളിയായ പെന്നിയുടെ പിൻമാറ്റവും. യുകെയുടെ മുൻ പ്രധാനമന്ത്രി ലിസ്ട്രസിന്റെ രാജിയ്ക്ക് പിന്നാലെയാണ് പ്രധാമന്ത്രി പദം ഋഷി സുനകിനെ തേടിയെത്തിയത്. ചരിത്രത്തിലെ ഏറ്റവും കുറഞ്ഞ കാലം സ്ഥാനത്ത് ഇരുന്ന പ്രധാനമന്ത്രിയെന്ന പേരുമായാണ് ലിസ്ട്രസിന്റെ മടക്കം. അധികാരമേറ്റെടുത്ത് 45-ാം ദിവസമാണ് ബ്രിട്ടീഷ് പ്രധാനമന്ത്രി ലിസ് ട്രസിന്റെ രാജി.
