സൂപ്പർ താരങ്ങളുടെ സിനിമകൾ മാത്രമല്ല, അവരുടെ വാഹനങ്ങൾക്കും ആരാധകരേറെയാണ്. മമ്മൂട്ടിയുടെ കാർ കളക്ഷനും, 369 എന്ന നമ്പറും മലയാളികൾക്ക് പ്രിയപ്പെട്ടതാണ്. 2255 എന്ന മോഹൻലാലിന്റെ നമ്പറും മലയാളികൾക്ക് മറക്കാൻ കഴിയില്ല. ഇപ്പോൾ സമൂഹമാദ്ധ്യമങ്ങളിൽ നിറയുന്നത് സൂപ്പർ താരത്തിന്റെ സൂപ്പർ കാരവാനാണ്. മോഹൻലാലിന്റെ പുതിയ കാരവാന്റെ വീഡിയോ പുറത്തുവിട്ടിരിക്കുകയാണ് ആശിർവാദ് സിനിമാസ്. ആഡംബര കാരവാന്റെ ഇന്റീരിയറിന്റെയും എക്സ്റ്റീരിയറിന്റെയും വിഡിയോയാണ് ഇപ്പോൾ പുറത്തുവന്നിരിക്കുന്നത്.
ലിവിങ് റൂമിന്റെയും മേക്കപ്പ് റൂമിന്റെയുമടക്കം ദൃശ്യങ്ങൾ വിഡിയോയിൽ കാണാം. ആവശ്യമുള്ളപ്പോൾ മാത്രം ഉയർന്നു വരുന്ന വലിയ ടിവിയാണ് കാരവാനിൽ ഉള്ളത്. ഫ്രിഡ്ജും, വാഷ് റൂമും അടക്കം നിരവധി സൗകര്യങ്ങൾ മോഹൻലാലിന്റെ പുതിയ വാഹനത്തിലുണ്ട്. കാരവാനിന്റെ ചിത്രങ്ങൾ നേരത്തെ തന്നെ സമൂഹമാദ്ധ്യമങ്ങളിൽ നിറഞ്ഞിരുന്നു. ബ്രൗണ് നിറത്തിലുള്ള വാഹനത്തിന് മനോഹരമായ ഗ്രാഫിക്സും നൽകിയിരിക്കുന്നു.
കോതമംഗലത്തെ ഓജസ് ഓട്ടോമൊബൈൽസാണ് മോഹൻലാലിന്റെ കാരവാൻ നിർമ്മിച്ചിരിക്കുന്നത്. ഭാരത് ബെൻസിന്റെ 1017 ബസ് ഷാസിയിലാണ് വാഹനം നിർമിച്ചിരിക്കുന്നത്. 3907 സിസി, നാലു സിലിണ്ടര് 4ഡി 34ഐ ഡീസല് എന്ജിനാണ് വാഹനത്തിന് കരുത്തേകുന്നത്. 170 ബിഎച്ച്പി കരുത്തും 520 എന്എം ടോര്ക്കും എഞ്ചിൻ ഉത്പാദിപ്പിക്കുന്നു. 2255 എന്ന തന്റെ ജനപ്രിയ നമ്പറാണ് പുതിയ കാരവാനിനും മോഹൻലാൽ നൽകിയിരിക്കുന്നത്.
