തിരുവനന്തപുരം: കാമുകി നൽകിയ ജ്യൂസും കഷായവും കുടിച്ചതിന് പിന്നാലെ യുവാവ് മരിച്ച സംഭവം കൊലപാതകം. പാറശ്ശാല സ്വദേശി ഷാരോണിനെ വിഷം നൽകി കൊലപ്പെടുത്തിയതാണെന്ന് പെൺകുട്ടി പോലീസിനോട് സമ്മതിച്ചു. പ്രണയ ബന്ധത്തിൽ നിന്നും പിന്മാറാൻ വിസമ്മതിച്ചതിനെ തുടർന്നാണ് വിഷം നൽകിയത് എന്നാണ് പെൺകുട്ടി പോലീസിനോട് പറഞ്ഞത്.
കഷായത്തിൽ കലർത്തിയാണ് പെൺകുട്ടി ഷാരോണിന് വിഷം നൽകിയത്. കോപ്പർ സൾഫേറ്റാണ് കഷായത്തിൽ കലർത്തിയത്. ഇതിന് മറ്റൊരു സുഹൃത്തിന്റെ സഹായം ലഭിച്ചെന്നും പെൺകുട്ടി മൊഴി നൽകിയിട്ടുണ്ട്. പെൺകുട്ടിയ്ക്ക് സൈനികനുമായി വിവാഹം നിശ്ചയിച്ചിരുന്നു. ഇതിന് പിന്നാലെ ഷാരോണിനോട് ബന്ധം അവസാനിപ്പിക്കാമെന്ന് പറഞ്ഞെങ്കിലും യുവാവ് വിസമ്മതിച്ചു. ഇതോടെയാണ് വിഷം നൽകിയത്.
അന്വേഷണത്തിന്റെ ഭാഗമായി പെൺകുട്ടിയെ പോലീസ് സ്റ്റേഷനിലേക്ക് വിളിപ്പിച്ചിരുന്നു. ചോദ്യം ചെയ്യലിലാണ് പെൺകുട്ടി കുറ്റം സമ്മതിച്ചത്. ചോദ്യം ചെയ്യലിന്റെ ആരംഭം മുതൽ പരസ്പര വിരുദ്ധമായ കാര്യങ്ങളാണ് പെൺകുട്ടി അന്വേഷണ സംഘത്തോട് പറഞ്ഞത്. നിലവിൽ ജില്ലാ ക്രൈം ബ്രാഞ്ചിനാണ് അന്വേഷണ ചുമതല. എട്ട് മണിക്കൂറോളമാണ് ചോദ്യം ചെയ്തത്.
Comments