ന്യൂഡൽഹി: ലോക ശതകോടീശ്വരന്മാരുടെ പട്ടികയിൽ വീണ്ടും മൂന്നാം സ്ഥാനത്തേക്ക് കുതിച്ച് ഗൗതം അദാനി. ആമസോൺ സ്ഥാപകൻ ജെഫ് ബെസോസിനെ പിന്തള്ളിയാണ് ഗൗതം അദാനി വീണ്ടും ഫോർബ്സ് പട്ടികയിൽ മൂന്നാം സ്ഥാനത്ത് ഇടം പിടിച്ചത്. 131.9 ബില്ല്യൺ ഡോളറാണ് അദാനിയുടെ ആസ്തി. 314 മില്ല്യൺ ഡോളറിന്റെ വർധനയാണ് കഴിഞ്ഞ കുറച്ച് ദിവസങ്ങൾ കൊണ്ട് ഉണ്ടായത്.
ഗ്രീൻ എനർജി, ഡാറ്റാ സെന്ററുകൾ, എയർപോർട്ടുകൾ, ഹെൽത്ത്കെയർ തുടങ്ങിയ മേഖലകളിൾ ഗൗതം അദാനിയുടെ ഗ്രൂപ്പ് 150 ബില്യൺ ഡോളർ നിക്ഷേപിക്കുമെന്ന വാർത്തകളും പുറത്ത് വരുന്നുണ്ട്. ഏഴ് വർഷത്തിനിടെ 16 ഇരട്ടിയോളമാണ് അദാനി ഗ്രൂപ്പിന്റെ മൂലധനത്തിൽ ഉണ്ടായ ഉയർച്ച. 2015ൽ 16 ബില്ല്യൺ ഡോളറായിരുന്നു ഇത്. എന്നാൽ 2022 ആയതോടെ ഇത് 260 ബില്ല്യൺ ഡോളറായി ഉയരുകയായിരുന്നു.
126.9 ബില്യൺ ഡോളറിന്റെ ആസ്തിയുമായി ജെഫ് ബെസോസ് നാലാം സ്ഥാനത്തേക്ക് പിന്തള്ളപ്പെട്ടു. 156.5 ബില്ല്യൺ ഡോളറിന്റെ ആസ്തിയുമായി ബെർനാർഡ് അർനോൾട്ടാണ് പട്ടികയിൽ രണ്ടാം സ്ഥാനത്തുള്ളത്. ഇലോൺ മസ്കാണ് പട്ടികയിൽ ഒന്നാം സ്ഥാനത്ത് തുടരുന്നത്. 223.8 ബില്ല്യൺ ഡോളറിന്റെ ആസ്തിയാണ് മസ്കിനുള്ളത്.
Comments