വാഷിംഗ്ടൺ: സമൂഹമാദ്ധ്യമ ഭീമനായ ഇൻസ്റ്റഗ്രാമിന് തകരാറ് സംഭവിച്ചതായി റിപ്പോർട്ട്. ഉപഭോക്താക്കളുടെ അക്കൗണ്ടുകളെല്ലാം നോട്ടിഫിക്കേഷൻ പോലുമില്ലാതെ കൂട്ടത്തോടെ സസ്പെൻഡ് ചെയ്യപ്പെടുന്നു.
ഇൻസ്റ്റഗ്രാം പോളിസി ലംഘനങ്ങളുണ്ടായാൽ അക്കൗണ്ടുകൾ സസ്പെൻഡ് ചെയ്യുന്ന സമാന രീതിയിലാണ് ഇപ്പോൾ അക്കൗണ്ടുകൾ സസ്പെൻഡാകുന്നത്.ഫോളോവേഴ്സിനെയും നഷ്ടപ്പെടുന്നതായി പരാതിയുണ്ട്. എന്നാൽ അക്കൗണ്ടുകൾ സസ്പെൻഡാക്കുന്നതിന്റെ കാരണം വ്യക്തമല്ല. We Suspended your account on 31 october 2022′ എന്ന സന്ദേശമാണ് ഉപഭോക്താക്കൾക്ക് ലഭിക്കുന്നത്. കൂട്ടപണിമുടക്കിന് പിന്നിൽ വല്ല ഹാക്കർമാരുണ്ടോ എന്ന ആശങ്കയിലാണ് ആളുകൾ.
ഇതിനിടെ ആപ്പ് പണിമുടക്കിയത് കമ്പനി സ്ഥിരീകരിച്ചു. ട്വിറ്ററിലൂടെയാണ് ഇൻസ്റ്റഗ്രാമിന്റെ പ്രതികരണം. നിങ്ങളിൽ ചിലർക്ക് നിങ്ങളുടെ ഇൻസ്റ്റഗ്രാം അക്കൗണ്ട് ആക്സസ് ചെയ്യുന്നതിൽ പ്രശ്നങ്ങളുണ്ടെന്ന് ഞങ്ങൾക്കറിയാം. ഞങ്ങൾ അത് പരിശോധിക്കുന്നു, അസൗകര്യത്തിൽ ക്ഷമ ചോദിക്കുന്നു. എന്നും ട്വിറ്ററിൽ ഇൻസ്റ്റഗ്രാം പ്രതികരിച്ചു.
അതേസമയം ഇൻസ്റ്റഗ്രാം പണിമുടക്കിയതോടെ ഇൻസ്റ്റഗ്രാം ഡൗൺ എന്ന ഹാഷ്ടാഗ് ട്വിറ്ററിൽ വ്യാപകമായിട്ടുണ്ട്. പണിമുടക്കിയതിന് ട്രോളി നിരവധി മീമുകളാണ് ട്വിറ്ററിൽ പ്രത്യക്ഷപ്പെട്ടിരിക്കുന്നത്. ഇൻസ്റ്റഗ്രാം തകരാറിലായതോടെ മറ്റ് സമൂഹമാദ്ധ്യമങ്ങളെ ആശ്രയിക്കുന്നവരെയും ട്രോളി ആളുകൾ രംഗത്തെത്തിയിട്ടുണ്ട്.
കഴിഞ്ഞയാഴ്ച മെറ്റയുടെ കീഴിലുള്ള വാട്സ്ആപ്പും പണിമുടക്കിയിരുന്നു. മണിക്കൂറുകൾക്ക് ശേഷമാണ് പ്രശ്നം പരിഹരിച്ചത്
