രാജ്യമൊട്ടാകെ ശ്രദ്ധയാകർഷിച്ച് പ്രദർശനം തുടരുകയാണ് ഋഷബ് ഷെട്ടി സ്വന്തം സംവിധാനത്തിൽ നായകനായ ചിത്രം കാന്താര. ഇപ്പോഴിതാ ചിത്രം ഹിന്ദിയിലേക്ക് റീ മേക്ക് ചെയ്യുന്നതിന് തനിക്ക് താൽപര്യം ഇല്ലെന്ന് അറിയിച്ചിരിക്കുകയാണ് ഋഷബ് . ചിത്രവുമായി ബന്ധപ്പെട്ട് കഴിഞ്ഞ ദിവസം നടന്ന ഒരു അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്.
അഭിമുഖത്തിൽ ചിത്രം ഹിന്ദി റീമേക്ക് ചെയ്താൽ ഏത് ബോളിവുഡ് നടന് നായനായ ശിവ എന്ന വേഷം ചെയ്യാൻ സാധിക്കും എന്ന ചോദ്യത്തിന് മറുപടി പറയുകയായിരുന്നു അദ്ദേഹം. ഒരു ബോളിവുഡ് നടനും സിനിമയിൽ തന്റെ വേഷം ചെയ്യുന്നത് സങ്കൽപ്പിക്കാൻ തനിക്ക് കഴിയില്ല. അവരോട് ഈ വേഷത്തെ പറ്റി വിശദീകരിക്കുന്നത് അസാധ്യമാണെന്നുമായിരുന്നു ഋഷബിന്റെ മറുപടി.
ദൈവ കോലമായി ഞാൻ വൈകാരികമായി ബന്ധപ്പെട്ടിരിക്കുന്നു. ആത്മീയവുമായ യാത്രയായതിനാൽ ഞാനത് എങ്ങനെ ചെയ്തുവെന്ന് വിശദീകരിക്കാൻ പോലും എനിക്ക് കഴിയില്ല. ഇതെല്ലാം ഞങ്ങൾ കുട്ടിക്കാലം മുതൽ കണ്ട് വളർന്നതാണ്. ഒരു പാട് നല്ല അഭിനേതാക്കൾ ബോളിവുഡിൽ ഉണ്ട്. എന്നാൽ ശിവ എന്ന കഥാപാത്രം ആര് അഭിനയിക്കും എന്ന് എനിക്ക് സങ്കൽപ്പിക്കാൻ കഴിയില്ലെന്നും അദ്ദേഹം കൂട്ടിച്ചേർത്തു.
19ാം നൂറ്റാണ്ട് പശ്ചാത്തലമാക്കുന്ന ചിത്രത്തിന്റെ കഥ നടക്കുന്നത് കുന്താപുരയിലാണ്. ബിഗ് ബജറ്റിൽ വന്ന കെജിഎഫ് 2-വിന്റെ സ്വീകാര്യതയെ പോലും മറികടക്കാൻ ഋഷബ് ഷെട്ടിയുടെ കാന്താരയ്ക്ക് കഴിഞ്ഞു. സെപ്റ്റംബർ 30-നാണ് ചിത്രം റിലീസ് ചെയ്തത്. ഒക്ടോബർ 31 വരെ ചിത്രം ലോകമെമ്പാടുമായി 250 കോടി രൂപ നേടി മുന്നേറുകയാണ്.ഹൊംബാലെയുടെ ബാനറിൽ വിജയ് കിരഗണ്ഡൂർ നിർമ്മിച്ച ചിത്രത്തിൽ സപ്തമി ഗൗഡ, കിഷോർ, അച്യുത് കുമാർ, പ്രമോദ് ഷെട്ടി, ഷനിൽ ഗുരു, പ്രകാശ് തുമിനാട്, മാനസി സുധീർ, നവീൻ ഡി പടീൽ, സ്വരാജ് ഷെട്ടി, ദീപക് റായ് പനാജി, പ്രദീപ് ഷെട്ടി, രക്ഷിത് രാമചന്ദ്രൻ ഷെട്ടി, പുഷ്പരാജ് ബൊല്ലാറ തുടങ്ങിയവരാണ് മറ്റ് പ്രധാന താരങ്ങൾ.
