ഈ വർഷത്തെ അവസാനത്തെ പൂർണ ചന്ദ്രഗ്രഹണം നവംബർ എട്ടിന്. സൂര്യപ്രകാശത്തിൽ നിന്നുള്ള ഭൂമിയുടെ നിഴൽ ചന്ദ്രനിൽ പതിക്കുമ്പോഴാണ് ചന്ദ്രഗ്രഹണം സംഭവിക്കുന്നത്. അതായത് സൂര്യനും ഭൂമിയും ചന്ദ്രനും ഒരേ നേർരേഖയിൽ വരും. ചന്ദ്രനും സൂര്യനും ഇടയിലായിരിക്കും ഭൂമിയുടെ സ്ഥാനം. ഈ സമയം ചന്ദ്രനെ ചുവന്ന നിറത്തിലായിരിക്കും കാണാൻ സാധിക്കുക. നവംബർ എട്ടിന് ശേഷം പൂർണ ചന്ദ്രഗ്രഹണം കാണണമെങ്കിൽ 2025 വരെ കാത്തിരിക്കേണ്ടി വരും
ഇന്ത്യയുടെ കിഴക്കൻ സംസ്ഥാനങ്ങളിലായിരിക്കും പൂർണ ചന്ദ്രഗ്രഹണം ദൃശ്യമാകുന്നത്. മറ്റ് ഭാഗങ്ങളിലെല്ലാം ഭാഗിക ഗ്രഹണമാകും ദൃശ്യമാകുന്നത്. കൊൽക്കത്ത, ഷിലിഗുരി, പട്ന, റാഞ്ചി, ഗുവാഹത്തി എന്നിവിടങ്ങളിൽ നിന്ന് പൂർണ ചന്ദ്രഗ്രഹണം ദൃശ്യമാകും. ഉച്ചയ്ക്ക് ശേഷം 2.39 മുതൽ ഗ്രഹണം ദൃശ്യമായി തുടങ്ങും. ലാറ്റിനമേരിക്കൻ രാജ്യങ്ങളിൽ 3.46ഓടെ ഗ്രഹണം പൂർണ്ണമാകും. 6.19നാണ് ഗ്രഹണം അവസാനിക്കുന്നത്.
ഡൽഹി-5.32, കൊൽക്കത്ത-4.56, മുംബൈ-6.05, ബംഗളൂരു-5.53, ചെന്നൈ-5.42, ഗുവാഹത്തി-4.37 എന്നിങ്ങനെയാണ് ഗ്രഹണം ആരംഭിക്കുന്ന സമയം. പാകിസ്താൻ, അഫ്ഗാനിസ്ഥാൻ, വടക്ക്-കിഴക്കൻ യൂറോപ്പ്, റഷ്യ, ഓസ്ട്രേലിയ, വടക്കേ അമേരിക്ക, തെക്കേ അമേരിക്ക തുടങ്ങിയ ഇടങ്ങളിലും ഗ്രഹണം മികച്ച രീതിയിൽ ദൃശ്യമാകും.
