നാടോടിക്കാറ്റിലെ ദാസനും വിജയനും മലയാളികൾക്ക് എന്നും പ്രിയപ്പെട്ടവരാണ്. മോഹൻലാൽ ശ്രീനിവാസൻ കൂട്ടുകെട്ടിനെ പൊതുവേ ഈ പേരിലാണ് അറിയപ്പെടുന്നതും. കുറച്ചുനാളുകൾക്ക് മുൻപ് ഇരുവരും ഒരേ വേദി പങ്കിട്ടതിന്റെയും മോഹൻലാൽ ശ്രീനിവാസന്റെ കവളിൽ സ്‌നേഹ ചുംബനം നൽകുന്നതിന്റെയും ചിത്രങ്ങൾ സമൂഹമാദ്ധ്യമങ്ങളിൽ തരംഗമായി മാറിയിരുന്നു. ഇപ്പോഴിതാ വീണ്ടും ഒരു വിവാഹ വേദിയിൽ തന്റെ സ്‌നേഹിതൻ വിജയനെ ചേർത്ത് നിർത്തുന്ന ദാസന്റെ ദൃശ്യങ്ങളാണ് വൈറലായിരിക്കുന്നത്.
മെറിലാൻഡ് സ്റ്റുഡിയോ ഉടമ പി സുബ്രഹ്മണ്യത്തിന്റെ ചെറുമകനും നിർമ്മാതാവുമായ വിശാഖ് സുബ്രഹ്മണ്യത്തിന്റെ വിവാഹത്തിൽ പങ്കെടുക്കാൻ എത്തിയതായിരുന്നു ശ്രീനിവാസൻ. കാറിൽ ശ്രീനിവാസനെ മകൻ വിനീതാണ് കൈ പിടിച്ച് വിവാഹ വേദിയിലേക്ക് കൊണ്ടു പോയത്. പിന്നാലെ ദൃശ്യങ്ങളിൽ കാണാൻ സാധിക്കുന്നത് മോഹൻലാലിനൊപ്പം നിറചിരിയോടെ ഇരിക്കുന്ന ശ്രീനിവാസനെയാണ്. സഹപ്രവർത്തകരോട് കുശലം ചോദിച്ചും തമാശകൾ പറഞ്ഞു ഇരിക്കുന്ന താരത്തിന്റെ ദൃശ്യങ്ങൾ ദാസന്റെയും വിജയന്റെയും ആരാധകർ ഏറ്റെടുത്തു കഴിഞ്ഞു.
നടൻ എന്നതിലുപരി താനൊരു മികച്ച സംവിധായകനും തിരക്കഥാകൃത്തും ആണെന്ന് ഇതിനോടകം അദ്ദേഹം തെളിയിച്ചിട്ടുമുണ്ട്. ഇതിനിടെയാണ് അപ്രതീക്ഷിതമായി താരം രോഗബാധിതനായി ചികിത്സയിലാണെന്ന വാർത്ത പുറത്ത് വന്നത്. ആൻജിയോഗ്രാം പരിശോധനയിൽ ധമനികളിലെ രക്തമൊഴുക്കിന് തടസം നേരിടൽ കണ്ടെത്തുകയായിരുന്നു. തുടർന്ന് അദ്ദേഹത്തെ ബൈപ്പാസ് സർജറിക്കും വിധേയനാക്കി. നീണ്ട ഇടവേളയ്‌ക്ക് ശേഷം അദ്ദേഹം സിനിമയിലേക്കും തിരിച്ചുവരാൻ ഒരുങ്ങുകയാണ്.
ശ്രീനിവാസന്റേതായി കഴിഞ്ഞ ദിവസം പ്രഖ്യാപിച്ചത് കുറുക്കൻ എന്ന ചിത്രമാണ്. നവാഗതനായ ജയലാൽ ദിവാകരൻ സംവിധാനം ചെയ്യുന്ന ചിത്രത്തിൽ വിനീത് ശ്രീനിവാസൻ, ഷൈൻ ടോം ചാക്കോ എന്നിവരാണ് മറ്റു കേന്ദ്ര കഥാപാത്രങ്ങളെ അവതരിപ്പിക്കുന്നത്. സുധീർ കരമന, ശ്രീകാന്ത് മുരളി, ജോജി ജോൺ, അശ്വത് ലാൽ, മാളവിക മേനോൻ, ഗൗരി നന്ദ, ശ്രുതി ജയൻ, അസീസ് നെടുമങ്ങാട്, അഞ്ജലി സത്യനാഥ്, അൻസിബ ഹസ്സൻ, ബാലാജി ശർമ്മ, കൃഷ്ണൻ ബാലകൃഷ്ണൻ, നന്ദൻ ഉണ്ണി എന്നിവർ മറ്റു കഥാപാത്രങ്ങളെ അവതരിപ്പിക്കുന്നു.
Leave a Comment