ന്യൂഡൽഹി : യേശു ക്രസ്തുവിന്റെ ട്വിറ്റർ അക്കൗണ്ട് വെരിഫൈ ചെയ്തതിന് പിന്നാലെ സാത്താനും ബ്ലൂ ടിക്ക് നൽകി ട്വിറ്റർ. സാത്താൻ എന്ന പേരിൽ വിചിത്ര ജീവിയുടെ പ്രൊഫൈൽ ഉള്ള അക്കൗണ്ടിനാണ് ബ്ലൂ ടിക്ക് ലഭിച്ചിരിക്കുന്നത്. നരകത്തിന്റേത് എന്ന് തോന്നിക്കുന്ന കവർ ഫോട്ടോയുമുണ്ട് ഇതിൽ.
ഇലോൺ മസ്‌ക് ട്വിറ്റർ ഏറ്റെടുത്തതിന് പിന്നാലെ വെരിഫിക്കേഷൻ നടപടികളിൽ മാറ്റം വരുത്തിയിരുന്നു. അക്കൗണ്ട് വെരിഫൈ ചെയ്യാൻ പ്രതിമാസം എട്ട് ഡോളർ അടച്ചാൽ മതിയെന്നാണ് പുതിയ നിയമം. 305000 ഫോളോവേഴ്‌സുണ്ട് സാത്താൻ എന്ന ഈ അക്കൗണ്ടിന്. ഉപയോക്താവ് 246 പേരെ ഫോളോ ചെയ്യുന്നുണ്ട്.
നേരത്തെ ജീസസ് ക്രൈസ്റ്റ് എന്ന പേരിൽ ആരംഭിച്ച അക്കൗണ്ടും ട്വിറ്റർ വെരിഫൈ ചെയ്തിരുന്നു. യേശു ക്രിസ്തുവിന്റെ പ്രൊഫൈലുള്ള അക്കൗണ്ടാണിത്. 7,82,000 ഫോളോവേഴ്‌സാണ് ഈ ട്വിറ്റർ അക്കൗണ്ടിനുള്ളത്. എന്നാൽ ഉപയോക്താവ് തിരിച്ച് ആരെയും ഫോളോ ചെയ്തിട്ടുമില്ല. ഇത്തരം അക്കൗണ്ടുകളെ വെരിഫൈ ചെയ്യാൻ സാധിക്കുന്ന തരത്തിൽ നയങ്ങളിൽ മാറ്റം വരുത്തിയ ട്വിറ്ററിന്റെ നടപടികൾക്കെതിരെ വ്യാപക വിമർശനങ്ങളാണ് ഉയരുന്നത്.
