അപ്പം, പുട്ട്, പൊറോട്ട, ചപ്പാത്തി എന്നിവയ്ക്കൊപ്പം കഴിക്കാവുന്ന തകർപ്പൻ ഐറ്റമാണ് പോർക്ക് റോസ്റ്റ്. നാവിൽ വെള്ളമൂറുന്ന രുചിയിൽ എങ്ങനെ തകർപ്പൻ പോർക്ക് റോസ്റ്റ് തയ്യാറാക്കാം എന്ന് നോക്കാം.
ആദ്യം കഴുകി വൃത്തിയാക്കിയ പന്നിയിറച്ചി ഉപ്പും മഞ്ഞളും ഇട്ട വെള്ളത്തിൽ മുക്കി വെക്കുക. ശേഷം ഇഞ്ചി, വെളുത്തുള്ളി, കടുക് എന്നിവ മിക്സിയിൽ ഇട്ട് നന്നായി അരച്ചെടുക്കുക.
പാചകം ചെയ്യാൻ ഉപയോഗിക്കുന്ന ചുവട് കട്ടിയുള്ള പാത്രം അടുപ്പിൽ വെച്ച് എണ്ണയൊഴിച്ച് ചൂടാകുമ്പോൾ അതിലേക്ക് കനം കുറച്ച് അരിഞ്ഞ സവാളയും നെടുകെ പിളർന്ന പച്ചമുളകും കറിവേപ്പിലയും ഇട്ട് വഴറ്റുക. നല്ലതുപോലെ വഴന്നു വന്ന ശേഷം ഇതിലേക്ക് ജിഞ്ചർ- ഗാർലിക് പേസ്റ്റ് ചേർക്കുക.
കൂട്ട് മൂത്ത് മണം വന്നു കഴിഞ്ഞാൽ, ഇതിലേക്ക് മഞ്ഞൾ പൊടി, മുളക് പൊടി, കുരുമുളക് എന്നിവ ചേർത്ത് പച്ചമണം മാറുന്നത് വരെ വഴറ്റുക. അരപ്പ് നന്നായി മൂത്ത ശേഷം ഇതിലേക്ക് കഴുകി വൃത്തിയാക്കി വെച്ചിരിക്കുന്ന പന്നിയിറച്ചിയും ലേശം വിനാഗിരിയും ആവശ്യത്തിന് ഉപ്പും ചേർത്ത് നല്ലതുപോലെ ഇളക്കി യോജിപ്പിച്ച് അടച്ച് വേവിക്കുക. ഇറച്ചി നന്നായി വേവുന്നത് വരെ വെള്ളം ഒഴിച്ചു കൊടുത്ത് വറ്റിച്ചു കൊണ്ടിരിക്കുക. വെന്ത് കഴിയുമ്പോൾ വാങ്ങി വെച്ച് ഉപയോഗിക്കുക.
