ദോഹ: ഖത്തറിലെ ലോകകപ്പ് ഫുട്ബോൾ മത്സരത്തിലെ നിയന്ത്രണങ്ങളെ കുറിച്ചുള്ള വിമർശനങ്ങൾക്ക് മറുപടിയുമായി ഫിഫ പ്രസിഡന്റ് ജിയാനി ഇൻഫാന്റിനോ.3,000 വർഷമായി യൂറോപ്യൻമാർ ചെയ്ത് കൂട്ടിയ തെറ്റുകൾക്ക് മാപ്പ് പറഞ്ഞേ തീരുവെന്നും തനിക്ക് ഖത്തറിനെ ഒരു തരത്തിലും സംരക്ഷിക്കേണ്ടതില്ല, അവർക്ക് സ്വയം പ്രതിരോധിക്കാനറിയാമെന്നും അദ്ദേഹം പറഞ്ഞു.
‘യൂറോപ്യൻ രാജ്യങ്ങൾ മുന്നോട്ടുവയ്ക്കുന്ന ധാർമിക പാഠം വെറും ഏകപക്ഷീയമായ കാപട്യമാണ്. നിങ്ങൾക്ക് ജീവിതത്തിന്റെ പാഠങ്ങളൊന്നും നൽകാൻ ഞാനുദ്ദേശിക്കുന്നില്ല. പക്ഷേ ഇവിടെ നടക്കുന്നത് കടുത്ത അനീതിയാണ്. പാശ്ചാത്യ ലോകത്ത് നിന്ന് പല പാഠങ്ങളും പഠിക്കാൻ ചില യൂറോപ്യൻ രാജ്യങ്ങൾ ഞങ്ങളോട് പറയുന്നുണ്ട്. ഞാനൊരു യൂറോപ്യൻ ആണ്. കഴിഞ്ഞ 3,000 വർഷമായി യൂറോപ്യന്മാർ ചെയ്ത തെറ്റുകൾക്ക്, ധാർമികത പഠിപ്പിക്കുന്നതിന് മുൻപ് അടുത്ത 3,000 വർഷത്തേക്ക് ക്ഷമ ചോദിക്കണമെന്നായിരുന്നു’ ഫിഫ പ്രസിഡന്റിന്റെ പരാമർശം.
ഖത്തറിലെ ലോകകപ്പ് സ്റ്റേഡിയങ്ങളിൽ മദ്യം നൽകില്ലെന്ന കാര്യത്തിലും അദ്ദേഹം വിശദീകരണം നൽകിയിരുന്നു. മൂന്ന് മണിക്കൂർ ബിയർ കുടിച്ചില്ലെങ്കിലും നിങ്ങൾ ജീവിക്കുമെന്നാണ് ഫിഫ പ്രസിഡന്റ് ഇന്നലെ പറഞ്ഞത്. ഫ്രാൻസിലെയും സ്പെയിനിലെയും സ്കോട്ട്ലൻഡിലെയും സ്റ്റേഡിയങ്ങളിൽ മദ്യം നിരോധിക്കുന്നതിന് ഒരു കാരണമുണ്ടാകുമെന്നും അദ്ദേഹം ചൂണ്ടിക്കാട്ടിയിരുന്നു.
