ഖത്തർ: ഖത്തർ ലോകകപ്പിൽ ഗ്രൂപ്പ് ബിയിൽ നടന്ന യുഎസ്എ-വെയ്ൽ മത്സരം സമനിലയിൽ. ആദ്യ പകുതിയിൽ ടിം വിയ നേടിയ ഗോളിലൂടെ മുന്നിലെത്തിയ യുഎസ്എയെ, 82ാം മിനിട്ടിൽ പെനാൽറ്റിയിലൂടെ ഗാരത് ബെയ്ൽ നേടിയ ഗോളിലൂടെ വെയ്ൽസ് സമനില പിടിക്കുകയായിരുന്നു. 36ാം മിനിട്ടിലായിരുന്നു ടിം വിയയുടെ ഗോൾ. ഖത്തർ ലോകകപ്പിലെ ആദ്യ സമനിലയാണിത്. ഇംഗ്ലണ്ടാണ് ഗ്രൂപ്പ് ബിയിൽ മുന്നിൽ.
മത്സരത്തിന്റെ തുടക്കം മുതൽ പന്തിന്മേലുണ്ടായിരുന്ന ആധിപത്യം യുഎസ്എ ആദ്യ പകുതിയിലുടനീളം തുടർന്നു. വെയ്ൽസ് താരങ്ങൾ ആദ്യ പകുതിയിൽ പന്ത് കിട്ടാതെ വലയുന്ന കാഴ്ച ആരാധകരിൽ നിരാശ പടർത്തി. ലെഫ്റ്റ് ബാക്ക് ആന്റണി റോബിൻസന്റെ പ്രകടനം വെയ്ൽസ് താരങ്ങൾക്ക് കനത്ത ഭീഷണിയായിരുന്നു. രണ്ടാം പകുതിയിലാണ് വെയ്ൽസ് മത്സരത്തിലേക്ക് തിരിച്ച് വന്നത്. ഇതോടെ മത്സരം കൂടുതൽ ആവേശകരമായി. ഈ തിരിച്ചുവരവിന്റെ തുടർച്ചയായിരുന്നു അവർ നേടിയ സമനില ഗോൾ. ആദ്യ പകുതിയിൽ തന്നെ നാല് മഞ്ഞക്കാർഡുകളാണ് റഫറി പുറത്തെടുത്തത്. ഇരു ടീമുകളിലേയും താരങ്ങൾക്ക് രണ്ട് വീതം മഞ്ഞക്കാർഡ് ലഭിച്ചു.
64 വർഷത്തെ ഇടവേളയ്‌ക്ക് ശേഷമാണ് വെയ്ൽസ് ലോകകപ്പ് മത്സരം കളിക്കാനിറങ്ങുന്നത്യ 2014ലാണ് യുഎസ് അവസാനമായി ലോകകപ്പ് മത്സരത്തിനിറങ്ങിയത്. വെയ്ൽസിനെതിരായ മത്സരത്തിൽ യുഎസ്സിനാണ് വിജയസാധ്യത കൽപ്പിച്ചിരുന്നത്. 1958ലാണ് വെയ്ൽസ് ഇതിന് മുൻപ് ലോകകപ്പ് കളിച്ചത്.
