സാധനങ്ങൾക്ക് തീയിട്ട് ആനന്ദം കണ്ടെന്നുന്ന ശീലം നിങ്ങൾക്കുണ്ടോ? ഇതിനെ നിസാരമായി കാണരുത്. ഒരുപക്ഷേ പൈറോമാനിയ എന്ന ഗുരുതരമായ മനോരോഗം നിങ്ങളെ പിടികൂടിയിട്ടുണ്ടാകാം.
എന്താണ് പൈറോമാനിയ? സാധനങ്ങൾക്ക് ബോധപൂർവം തീയിടുന്നതിലൂടെ ലഭിക്കുന്ന ആനന്ദം ആസ്വദിക്കുകയും, ഇത് സ്വയം നിയന്ത്രിക്കാൻ ആകാതെ വരുകയും ചെയ്യുന്ന ഒരു അവസ്ഥയാണ് പൈറോമാനിയ. തീ കത്തിക്കുന്നതിലൂടെ, ഈ രോഗമുള്ള വ്യക്തികൾക്ക് മാനസിക സമ്മർദ്ദം അകലുകയും ആന്തരിക ആനന്ദം ലഭ്യമാകുകയും ചെയ്യുന്നു.
എന്താണ് പൈറോമാനിയയുടെ ലക്ഷണങ്ങൾ? ആധുനിക മനശാസ്ത്രം ഒരു പെരുമാറ്റ വൈകല്യമായാണ് പൈറോമാനിയയെ കാണുന്നത്. തീ കത്തിക്കുന്നതിന് മുൻപ്, ഈ രോഗമുള്ളവുർ വലിയ തോതിൽ മാനസിക സമ്മർദ്ദത്തിന് അടിപ്പെടുന്നു. തീ കാണുന്നതോടെ ഇവരിൽ വല്ലാത്ത ഒരു ഭാവവ്യത്യാസം പ്രകടമാകുന്നു.
തീ കത്തുന്നത് ദീർഘനേരം നോക്കി നിൽക്കുക, കത്തുന്ന തീയെ കുറിച്ച് നുണ പറയുക, സാധനങ്ങൾ കത്തിച്ച ശേഷം അത് മറ്റുള്ളവരുടെ പേരിൽ ആരോപിക്കുക തുടങ്ങിയവയും ഈ രോഗം കടുക്കുമ്പോൾ രോഗികൾ പ്രകടമാക്കുന്ന ലക്ഷണങ്ങളാണ്.
പൈറോമാനിയയുടെ യഥാർത്ഥ കാരണങ്ങളെ കുറിച്ച് മനശാസ്ത്രജ്ഞന്മാർക്കിടയിൽ വ്യത്യസ്ത അഭിപ്രായങ്ങളാണ് ഉള്ളത്. ചിലർ ഇതിനെ ഒരു ജനിതക തകരാറായി കാണുന്നു. ബൈപോളാർ ഡിസോർഡർ, ചൂതാട്ട ശീലം, ലഹരി വസ്തുക്കളുടെ അമിതോപയോഗം, സാമൂഹ്യ വിരുദ്ധ പെരുമാറ്റ വൈകല്യം എന്നിവയോടൊപ്പവും ഈ രോഗം ചിലരിൽ കാണപ്പെടുന്നു. സ്ത്രീകളെ അപേക്ഷിച്ച് പുരുഷന്മാരിലാണ് ഈ രോഗം കൂടുതലായി കാണപ്പെടുന്നത്.
എന്നാൽ, രാഷ്ട്രീയ ലാഭത്തിന് വേണ്ടിയോ ആളുകളെ തേജോവധം ചെയ്യുന്നതിന് വേണ്ടിയോ വസ്തുവകകൾ നശിപ്പിക്കുന്നതിന് വേണ്ടിയോ ഇൻഷുറൻസ് തുക തട്ടിയെടുക്കുന്നതിന് വേണ്ടിയോ സാധനങ്ങൾക്ക് തീയിടുന്നതിനെ മനോരോഗമായി കാണാനാകില്ല. അത് കൃത്യമായി നിയമം മൂലം കൈകാര്യം ചെയ്യപ്പെടേണ്ട ക്രിമിനൽ കുറ്റമാണ്. പൈറോമാനിയക്ക് ആധുനിക മനശാസ്ത്രത്തിൽ ഫലപ്രദമായ ചികിത്സ ലഭ്യമാണ്. അതിനെ തീവെപ്പ് എന്ന കുറ്റകൃത്യവുമായി താത്വികമായി ബന്ധിപ്പിക്കാനാവില്ല.
